ބޭނުންފުޅުވަނީ މަޝްރޫޢުތައް އަވަހަށް ކުރިއަށްގެންގޮސް ނަތީޖާ ނެރެން ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

ރައީސް މިފަދައިން ވިދާޅުވީ މިއަދު ހއ. މާރަންދޫ ރައްޔިތުންނާ ބައްދަލުކުރައްވައި ދެއްކެވި ވާހަކަފުޅުގައެވެ.

ރައީސް ވިދާޅުވީ ރިޔާސީ އިންތިޚާބުގައި މާރަންދޫއަށް ވެވަޑައިގެންނެވި ވަޢުދުތައް ހަނދާން އެބަހުރި ކަމަށާއި، މިއަހަރު އެ ހުރިހާ ކަމަކަށް ޢަމަލީ ސިފަ ގެނައުމަކީ އެމަނިކުފާނުގެ އަމާޒު ކަމަށެވެ. އަދި ކުރިން ފަށާފައިވާ މަޝްރޫޢުތަކާއި ސޮއިކޮށްފައިވާ މަޝްރޫޢުތަކެއް މާރަންދޫގައިވެސް ކުރިއަށް ނުގޮސް ހުރިކަން ފާހަގަކުރައްވައި، މިއަހަރުގެ ބަޖެޓުގައި އެ މަޝްރޫޢުތަކަށް ފައިސާ ކަނޑައަޅާފައިވާކަމަށް ވިދާޅުވިއެވެ.

މާރަންދޫގައި ކުރިއަށް ގެންދިއުމަށް ހަމަޖެހިފައިވާ މަޝްރޫޢުތަކުގެ ތެރޭގައި ބަނދަރުގެ މަޝްރޫޢު، ސްކޫލްގެ ޖާގައިގެ ދަތިކަން ހައްލުކުރުން، ކުޅިވަރުގެ ވަސީލަތްތައް ތަރައްޤީކުރުން އަދި ޞިއްޙީ މަރުކަޒުގެ ޚިދުމަތްތައް ފުޅާކުރުން ހިމެނެއެވެ. މީގެ އިތުރުން، އާރުޓީއެލް ފެރީގެ ޚިދުމަތް ޝެޑިއުލެއްގެ ތެރެއިން މާރަންދޫއަށް ކުރުމަށް ހަމަޖެހިފައިވާ ކަމަށާއި، ކުނި މެނޭޖުކުރުމުގެ މަޝްރޫޢުވެސް ކުރިއަށް ގެންދިއުމަށް ހަމަޖެހިފައިވާ ކަމަށް ރައީސް ވިދާޅުވިއެވެ.

ރައީސް އިތުރަށް ވިދާޅުވީ، ވަޒީރުންނާއެކު ރަށްރަށަށް ވަޑައިގަންނަވަނީ ސީރިއަސް މަސައްކަތްތަކެއް ކުރެއްވުމަށް ކަމަށާއި، ކައުންސިލާއި ޒިންމާދާރު ފަރާތްތަކާއެކު މަޝްވަރާކޮށް، ވީހާވެސް އަވަހަށް ކުރިއަށްދެވޭނެ ގޮތްތަކެއް ހޯދުމަށް ކަމަށެވެ. އަދި ދެ އަހަރު ދުވަހުގެ ތެރޭގައި މަޝްރޫޢުތައް ނިންމުމަށް މަސައްކަތްކުރައްވާނެ ކަމަށްވެސް ރައީސް ވިދާޅުވިއެވެ.

ރައީސް ވިދާޅުވީ ކުރިއަށް އޮތީ ތަރައްޤީގެ ދުވެލީގައި ގިނަ މަޝްރޫޢުތަކެއް ކުރިއަށްދާނެ ދުވަސްތަކެއް ކަމަށެވެ.