ސިޔާސީ ސަބަބުތަކަށްޓަކައި އެއްވެސް މީހަކު ހައްޔަރު ކުރުމަކީ މި ސަރުކާރުން ކުރާނެ ކަމެއް ނޫން ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

ހއ. އަތޮޅުގެ ރައްޔިތުންނާއި ބައްދަލު ކުރެއްވުމަށް މިހާރު ކުރައްވަމުން ގެންދަވާ ދަތުރުފުޅުގެ ތެރެއިން ދިއްދޫ ރައްޔިތުންނާއި ބައްދަލު ކުރެއްވުމަށް އެ ރަށަށް ވަޑައިގެން ދެއްކެވި ވާހަކަފުޅުގައި ރައީސް ވިދާޅުވީ މިހާތަނަށް ވެސް އެފަދަ ކަމެއް ކޮށްފައި ނުވާނެ ކަމަށާއި، ކުރިއަށް އޮތްތަނުގައި ވެސް ނުކުރައްވާނެ ކަމަށެވެ.

"މިދިޔަ ދުވަސްތަކުގައި ބައްލަވާ، ރާއްޖޭގައި ނޯންނާނެ ބަދަލުހިފުމުގެ ރޫޙެއް. ސިޔާސީ މީހަކަށް ވެގެން ހައްޔަރުކޮށްފައެއް ނޯންނާނެ. އެއްވެސް މީހަކަށް ސިޔާސީ ގޮތުން އަދަބެއް ނުދެން،" ރައީސް މުޢިއްޒު ވިދާޅުވިއެވެ.

އެމަނިކުފާނު ވިދާޅުވީ ޤާނޫނު އަސާސީން ލިބިދޭ ހުރިހާ ޙައްޤެއް ކޮންމެ މީހަކަށް ވެސް ބޭނުންކުރެވެންވާނެ ކަމަށާއި ޤާނޫނު އަސާސީން ކޮންމެ ރައްޔިތަކަށް ވެސް ލިބިދޭ ޙައްޤުތައް އެންމެ ފުރިހަމަ މިނުގައި ލިބިދިނުމަކީ މި ސަރުކާރުގެ ސިޔާސަތު ކަމަށެވެ. އަދި ޚިޔާލު ފާޅުކުރުމުގެ މިނިވަންކަމާއި އެއްވެއުޅުމުގެ މިނިވަންކަން ޤާނޫނު އަސާސީގައި ކަށަވަރުކޮށްދީފައިވާ ކަމަށް ފާހަގަކުރެއްވިއެވެ.

އެހެންކަމުން، ސިޔާސީ ގޮތުން އަނިޔާވެރިވެ، އެކަހެރިކޮށް، ބަންދުކޮށް ހެދުމަކީ އެމަނިކުފާނުގެ ކިބައިން ފެންނާނެ ކަމެއް ނޫން ކަމަށް ވިދާޅުވިއެވެ.

"މިހާތާކަށް ވެސް ނޯންނަނެ! އަދި ކުރިޔަށް އޮތް ތަނުގައިވެސް ނުފެންނާނެ! ކިތަންމެ އެއްޗެއް އަޅުގަނޑާއި ދިމާލަށް އަދި ސަރުކާރާއި ދިމާލަށް ކިޔުމަކީ ވެސް އަޅުގަނޑަށް މައްސަލައެއް ނޫން" ރައީސް ވިދާޅުވިއެވެ.

އެހެންނަމަވެސް، އެމަނިކުފާނު ހަނދުމަފުޅުކޮށްދެއްވީ، އަޅުގަނޑުމެން އެންމެންނަކީ ވެސް މުސްލިމުން ކަމަށާއި، އަނެކާ އާއި މުޚާޠަބުކުރާއިރު ރީތިބަހުން ވާހަކަ ދެއްކުމަށެވެ. ކޮންމެ ރައްޔިތަކީ ވެސް ޙުރުމަތްތެރި ވެގެންވާ ރައްޔިތެއްކަން ޤަބޫލުކުރަން ޖެހޭ ކަމަށާއި ކޮންމެ މީހެއްގެ ވެސް އަބުރެއް އޮތްކަން ޤަބޫލުކުރަން ޖެހޭނެ ކަމަށް އެމަނިކުފާނު ހަނދުމަފުޅު ކޮށްދެއްވިއެވެ.

ރައީސް ވިދާޅުވީ، ތިމާއަށްވުރެ ނިކަމެތި ކަމަށް އަނެކާއާއި ދޭތެރޭ ދެކުމަކީ ދީނީ ގޮތުން އޮތްގޮތެއް ނޫންކަން ޤަބޫލުކުރަން ޖެހޭނެ ކަމަށާއި ސިޔާސީ ގޮތުން ތިމަންނާ އަނެކާއާއި ޚިޔާލު ތަފާތުވުމަކީ އަނެކާ ކުޑަކޮށްލައި، ނިކަމެތިކޮށްލާ ކުޑައިމީސްކުރުމުގެ ޙައްޤު އެމީހާއަށް ލިބޭކަމެއް ނޫންކަން ގަބޫލުކުރަން ޖެހޭނެ ކަމަށެވެ.