ހއ. ނާގޯށީގައި ތަރައްޤީކުރަމުންދާ ރިސޯޓު އަވަހަށް ހުޅުވޭނެކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ރައީސް ހއ. އަތޮޅަށް ކުރައްވަމުންގެންދަވާ ދަތުރުފުޅުގައި އެ އަތޮޅު ފިއްލަދޫއަށް ވަޑައިގެން ރައްޔިތުންނާ ބައްދަލުކުރައްވައި ވާހަކަފުޅު ދައްކަވަމުން ވިދާޅުވީ މޯލްޑިވްސް ޓުއަރިޒަމް ޑިވެލޮޕްމަންޓް ކޯޕަރޭޝަން (އެމްޓީޑީސީ) އާ ނާގޯށި ހަވާލުކޮށްފައިވާތާ ގިނަ އަހަރުތަކެއް ވެފައިވާއިރު، އެ ރިސޯޓު ތަރައްޤީވުމަކީ އެ ސަރަޙައްދުގެ ރައްޔިތުންނަށް ފައިދާކުރާނެ މުހިންމު މަޝްރޫޢެއް ކަމަށެވެ.
"އިރާދަކުރެއްވިއްޔާ އެމްޓީޑީސީއަށް އެމަގު އަޅުގަނޑުމެން ފަހިކޮށްދޭނަން. ފަހިކޮށްދީ އެ ރަށް ރިސޯޓެއްގެ ގޮތުގައި ތަރައްޤީކޮށް ސަރުކާރުން އެހީތެރިކަން ދީގެން ހުޅުވުން އެއީ މިހާރު އަޅުގަނޑުމެންގެ އަމާޒަކީ." ރައީސް ވިދާޅުވިއެވެ.
ނާގޯށީގައި ރިސޯޓު ތަރައްޤީކުރުމަށް އެމްޓީޑީސީއާ މީގެ ކުރިން ތިން ފަހަރެއްގެ މަތިން އެ ރަށް ހަވާލުކޮށްފައިވެއެވެ. އެންމެ ފަހުން 2020 ވަނަ އަހަރު އެ ރަށް އެމްޓީޑީސީއާ ހަވާލުކުރި ނަމަވެސް، މިހާތަނަށް ރިސޯޓު ތަރައްޤީކުރެވިފައެއް ނުވެއެވެ.
ރައީސް ވިދާޅުވީ ނާގޯށީގެ މަސައްކަތް ނިންމުމަށް އެމްޓީޑީސީއަށް ލޯނު ފެސިލިޓީއެއް ދޫކުރުމުގެ މަޝްވަރާތައް މިހާރު ބޭންކް އޮފް މޯލްޑިވްސް އާއެކު ކުރިއަށްދާ ކަމަށެވެ. އަދި ހއ. އަތޮޅުގައި އިތުރު ރަށްތައް ޓުއަރިޒަމަށް ތަރައްޤީކުރުމަށް ފުރުޞަތު ދިނުމަށްވެސް ސަރުކާރުން ނިންމާފައިވާ ކަމަށް ރައީސް ވިދާޅުވިއެވެ.
