ތިނަދޫ ސިޓީ ކައުންސިލާ ގުޅޭ ގޮތުން އެންޓި ކޮރަޕްޝަން ކޮމިޝަން (އޭސީސީ) އިން ތަޙުޤީޤު ކުރަމުން އަންނަ މައްސަލަތަކަށް އެ ކައުންސިލުން އެއްބާރުލުން ނުދޭ ކަމަށް އޭސީސީން ބުނެފިއެވެ.
އޭސީސީން ތިނަދޫ ސިޓީ ކައުންސިލަށް ވަދެފައިވަނީ އެ ކައުންސިލުން ކުރިއަށް ގެންދިޔަ ތަރައްޤީގެ ބައެއް މަޝްރޫޢުތައް ވަކި ބަޔަކަށް މަންފާ ލިބޭ ގޮތަށް ކުރިއަށް ގެންދިޔަ ކަމަށް ސޯޝަލް މީޑިއާގައި ބައެއް މީހުން ތުހުމަތުކޮށްފައިވާތީ އެވެ.
އެ މައްސަލަތަކާ ގުޅިގެން އޭސީސީގެ ޓީމެއް އިއްޔެ ތިނަދޫ ސިޓީ ކައުންސިލްގައި ވަނީ ހަރަކާތްތެރިވެފައެވެ. އޭސީސީން ލިޔެކިޔުންތައް ހޯދުމަށް ތިނަދޫ ސިޓީ ކައުންސިލަށް ވަނުމުން ކައުންސިލުން އެކަން ސިފަކޮށްފައިވަނީ "ވައްކަމެއް" ގެ ގޮތުގައެވެ.
Advertisement
އެކަމާ ގުޅޭ ގޮތުން އޭސީސީން މިއަދު ނެރުނު ބަޔާނުގައި ބުނީ ތިނަދޫ ސިޓީއާ ގުޅޭ މައްސަލަތަކާ ގުޅޭ ގޮތުން ތަޙުޤީޤަށް ބޭނުންވާ ލިޔެކިޔުންތައް ހޯދުމުގެ މަސައްކަތް ކޮށްފައިވީ ނަމަވެސް އެކަމުގައި ކައުންސިލްގެ ފުރިހަމަ އެއްބާރުލުން ލިބިފައި ނުވާ ކަމަށެވެ. ނަމަވެސް ޤާނޫނު އަސާސީއާއި އޭސީސީގެ ޤާނޫނުގެ ދަށުން އެ ކޮމިޝަނުގެ ޤާނޫނީ އިމުގެ ތެރެއިން އެންމެހާ އިޖުރާއަތްތައް ފުރިހަމަ ކުރުމަށްފަހު ތަޙުޤީޤަށް ބޭނުންވާ ލިޔެކިޔުންތައް ހޯދާފައިވާ ކަމަށް އޭސީސީން ބުންޏެވެ.
އޭސީސީން ބުނީ އެކަމާ ގުޅޭ ގޮތުން ތިނަދޫ ސިޓީ ކައުންސިލުން ހާމަކޮށްފައިވާ މަޢުލޫމާތަކީ ދޮގު މަޢުލޫމާތެއް ކަމަށާއި އެ ކޮމިޝަނާ ގުޅޭ ގޮތުން ފަތުރަމުންދާ ޚަޤީޤަތާ ޚިލާފު މަޢުލޫމާތަކީ ބަލައިގަނެވޭ ކަމެއް ނޫން ކަމަށެވެ. އަދި އެކަމާ މެދު އޭސީސީން އިންތިހާއަށް ކަންބޮޑުވާ ކަމަށްވެސް ނޫސްބަޔާނުގައި ފާހަގަކޮށްފައިވެއެވެ.
