މާކުރަތު ކުޑަކުދިންގެ އެދުމުގެމަތީން އެރަށުގައި އެކުދިންނަށްޓަކައި ފުޓްސަލް ދަނޑެއް އަޅައިދިނުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ނިންމަވައިފިއެވެ.
ރ. އަތޮޅުގެ ބައެއް ރަށްތަކަށް މިހާރު ކުރައްވަމުންގެންދަވާ ރަސްމީ ދަތުރުފުޅުގެ ތެރެއިން މިއަދު މާކުރަތަށް ޒިޔާރަތްކުރެއްވި އިރު، އެ ރަށުގެ މަގުމަތިން ވަޑައިގަންނަވަނިކޮށް ކުޑަކުދިންތަކެއް ރައީސަށް ގޮވާލުމުން، ރައީސް އެކުދިންނާއި ބައްދަލުކުރެއްވިއެވެ. އޭގެ ތެރެއިން ކުއްޖަކު ރައީސްއަށް ސަލާމްކުރުމަށްފަހު ބުނީ "ރައީސްއޭ ތިމަންނަމެންނަށް ފުޓްސަލް ދަނޑެއް އަޅައިދެއްވާށޭ" އެވެ.
މިކަމާއި ގުޅިގެން ރައީސް ވަގުތުން ސްޕޯޓްސް މިނިސްޓަރު ގެންނަވައި، އެކުދިންނަށް ފުޓްސަލް ކުޅޭނެ ދަނޑެއް މާކުރަތުގައި އަޅައިދިނުމަށް އެންގެވިއެވެ. މިނިސްޓަރު އެކަމަށް އެއްބަސްވުމާއެކު، ރައީސް ކުޑަކުދިންނަށް އެކަން ޔަގީންކޮށްދެއްވިއެވެ.
Advertisement
ރައީސް މުޢިއްޒު ގެންދަވަނީ ރަށްރަށުގެ ރައްޔިތުންނާއި ބައްދަލުކުރައްވައި، އެބޭފުޅުންގެ ކަންބޮޑުވުންތަކާއި ބޭނުންތައް އަޑުއައްސަވައި ހައްލު ހޯއްދަވައިދެއްވަމުންނެވެ.
