ޣައްޒާ ހަނގުރާމައާއި ދެކޮޅަށް ފަލަސްތީނު ރައްޔިތުންގެ ދިފާޢުގައި ތެދުވި ޔަމަނުގެ ޙޫޘީން ޓެރަރިސްޓު ޖަމާއަތެއްގެ ހޮތުގައި އެމެރިކާގެ ރައީސް ޓްރަމްޕް ކަނޑައަޅުއްވައިފިއެވެ.

ޣައްޒާގެ މުސްލިމުންނަށް މަދަދުދޭތީވެ އިސްރާއީލާއި އެމެރިކާ އަދި ހުޅަނގުގެ ޤައުމުތަކުން ދަނީ ޔަމަނަށް ދޭތެރެދޭތެރެއިން ބޮން އަޅަމުންނެވެ.

ހުޅަނގުގެ ޤައުމުތަކާއި އެމެރިކާއިން ދިޔައީ ފަލަސްތީނުގެ ނަސްލެއް ނައްތާލުމަށް އިޒުރޭލުން ހިންގި އަނިޔާވެރި ޖަރީމާގައި ސިއްރުން އެކި ގޮތްގޮތުން ބައިވެރިވެ ތާއީދު ކުރަމުން ކަމަށް ތުހުމަތު ކުރެވެއެވެ. އެހެންކަމުން، އެފަރާތްތަކަށް ނިސްބަތްވާ އަދި އިސްރާއީލަށް އެހީތެރިކަން ފޯރުކޮށްދޭ ކުންފުނިތަކުގެ ބޯޓުފަހަރަށް ޔަމަނުގެ ހޫޘީން ދަނީ ޙަމަލާތައް ދެމުންނެވެ. 

މިއާއެކު މިފަހަރު ރައީސްކަމަށް ދެވަނަފަހަރަށް ހުވައި ކުރެއްވި އެމެރިކާގެ ރައީސް ޑޮނަލްޑް ޓްރަމްޕް، ޙޫޘީންނަކީ ޓެރަރިސްޓު ޖަމާއަތެއް ކަމަށް ކަނޑައަޅުއްވައި އެކަން އިއުލާންކުރެއްވީ އިއްޔެ ސޮއިކުރެއްވި ގަރާރެއްގައެވެ.

މި ގަރާރުގައި ސެކްރެޓަރީ އޮފް ސްޓޭޓް މާކޯ ރޫބިއޯއަށް އަންގާފައިވަނީ 30 ދުވަހުގެ ތެރޭގައި މިކަމާއި ގުޅޭ ރިޕޯޓެއް ހުށަހެޅުމަށެވެ. އޭގެ ފަހުން 15 ދުވަހުގެ ތެރޭގައި އެކަށީގެންވާ ފިޔަވަޅުތައް އެޅުމަށް ވެސް އަންގާފައިވެއެވެ