ރައީސް ދެއްވީ އިންނަމާދޫގައި ބޯޓް ބިލްޑިންގ ތަމްރީން މަރުކަޒެއް ޤާއިމްކޮށް، ވަޑިންނަށް ރަހުނަކާނުލައި ލޯނު ހަމަޖައްސައިދޭނެކަމުގެ ޔަޤީންކަން

އޮޑިދޯނިފަހަރު ބިނާކުރުމުގެ ދާއިރާގެ ވަޑިންނަށް ރަހުނަކާ ނުލައި ލޯނު ލިބޭނެ އިންތިޒާމު ހަމަޖައްސަވައި، އެ ދާއިރާއިން މީހުން ބިނާކުރުމަށްޓަކައި ޚާއްސަ މަރުކަޒެއް ރ. އިންނަމާދޫގައި ތަރައްޤީކުރައްވާނެކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ މިރޭ އިންނަމާދޫ ރައްޔިތުންނާ ބައްދަލުކުރައްވާ ދެއްކެވި ވާހަކަފުޅުގައެވެ.

އިންނަމާދޫއަކީ ރާއްޖޭގައި އެންމެ ފުޅާ ދާއިރާއެއްގައި އޮޑިދޯނިފަހަރު ބަނުމުގެ މަސައްކަތްކުރާ އެއް ރަށެވެ. ރައީސް އިންނަމާދޫއަށް ކުރެއްވި ދަތުރުފުޅުގައި ވަނީ ވަޑިންނާ ބައްދަލުކުރައްވާ އެފަރާތްތަކުގެ ކަންބޮޑުވުންތައް އަޑުއައްސަވާފައެވެ. އެފަރާތްތަކުގެ އެންމެ ބޮޑު ކަންބޮޑުވުމަކީ މަސައްކަތްކުރުމަށް ފައިސާ ލިބުމުގައި ހުރި ދަތިކަމާއި، ޒުވާނުން އެދާއިރާއަށް ވަނުމުގައި ހުރި ގޮންޖެހުންތަކެވެ.

ރައީސް ވިދާޅުވީ، ބޭންކިންގ ނިޒާމުގެ ތެރެއިން ރަހުނަކާ ނުލައި ވަޑިންނަށް ލޯނު ލިބޭނެގޮތް ހަމަޖައްސަވައިދެއްވާނެ ކަމަށެވެ. އަދި އޮޑިދޯނިފަހަރު ބަނުމުގެ ދާއިރާއަކީ ދިވެހިންނަށް އިސްކަންދޭ ދާއިރާއެއްގެ ގޮތުގައި ކަނޑައަޅުއްވާފައިވާ ކަމަށާއި، އެ ދާއިރާއިން ޒުވާނުން ބިނާކުރުމަށް ޚާއްސަ މަރުކަޒެއް އިންނަމާދޫގައި ތަރައްޤީކޮށްދެއްވާނެކަމުގެ ޔަޤީންކަން ރައީސް ދެއްވިއެވެ.

"މި މަސައްކަތުގެ ދާއިރާއިން ކުރިއަށްދާން ބޭނުންވާ ޒުވާނުންނަށް ކުރިއަށްދެވޭނެ މަގު ފަހިކޮށްދޭނަން. އަދި މިއީ ހަމައެކަނި ދިވެހިން، ތަމްރީންވެގެން، ދިވެހިން ކުރިއަށްދާ އަދި މިދާއިރާއަށް ދިވެހިން އިތުރުވާތަން ދެކެން ބޭނުން. އެހެންވީމަ އެކަން ކުރާނަން. ދެން އޮތީ ކައުންސިލުން ބިން ދިނުން." ރައީސް ވިދާޅުވިއެވެ.

މީގެ އިތުރުން، ރަށްރަށުގައި މިފަދަ މަސައްކަތްތަކަށް ބިން ދޫކުރުމުގައި ކައުންސިލްތަކަށް ދަތިތަކެއް ހުރުމުން، އާމްދަނީ ލިބޭނެގޮތަށް 20 އަހަރުގެ މުއްދަތަކަށް ކައުންސިލްތަކަށް ބިން ދޫކުރެވޭނެ ގޮތްވެސް ހަމަޖައްސަވާނެކަމަށް ރައީސް ވިދާޅުވިއެވެ.

އިންނަމާދޫގެ ތަރައްޤީގެ އެހެނިހެން މަޝްރޫޢުތަކަށް އަލިއަޅުއްވާލައްވަމުން ރައީސް ވިދާޅުވީ، ގެދޮރުގެ މައްސަލަ ޙައްލުކުރުމަށް 50 ޔުނިޓުގެ ހައުސިންގ މަޝްރޫޢުއެއް ހިންގުމަށް ނިންމާފައިވާކަމަށެވެ. އަދި ސްކޫލަށް ޖާގަ އިތުރުކޮށްދީ، ސިއްޙީ މަރުކަޒުގެ ޚިދުމަތް ފުޅާކޮށް، ކުޅިވަރުގެ ވަޞީލަތްތައް ޤާއިމްކޮށް، ގިރާ ސަރަޙައްދު ހިމާޔަތްކޮށް، ނަރުދަމާ ނިޒާމުގެ މައްސަލަތައްވެސް ޙައްލުކޮށްދެއްވާނެ ކަމަށް ރައީސް ވިދާޅުވިއެވެ. މި ހުރިހާ ކަމެއް ތަރުތީބުކުރައްވައިގެން ދެ އަހަރު ދުވަހުގެ ތެރޭގައި މައްސަލަތަކަށް ފުރިހަމަ ޙައްލެއް ގެނެސްދެއްވާނެކަމަށް ރައީސް ވިދާޅުވިއެވެ.

އިންނަމާދޫގެ ތަރައްޤީއަށް ގިނަ މަސައްކަތްތަކެއް ކުރަންޖެހިފައިވާކަން ފާހަގަކުރައްވައި، ރައްޔިތުން ބޭނުންވާގޮތަށް އެ މަޝްރޫޢުތައް ކުރިއަށްގެންދަވާނެ ކަމަށް ރައީސް ވިދާޅުވިއެވެ.