ރޯލިން ޓޮބޭކޯގެ ޝިޕްމަންޓެއް ދޫކޮށްލާފައި ވަނީ އެފަދަ ތަކެތި ރާއްޖެއަށް އެތެރެކުރުން ޤާނޫނަކުން މަނާކޮށްފައި ނުވާތީ ކަމަށް މޯލްޑިވްސް ކަސްޓަމްސް ސަރވިސްއިން މިއަދު ހާމަކޮށްފިއެވެ.

ދައުލަތުގެ މީޑިއާއަށް ދެއްވި އިންޓަވިއުއެއްގައި ކަސްޓަމްސްގެ ޑެޕިއުޓީ ޗީފް ސުޕްރިޓެންޑެންޓް އަހުމަދު ނިޔާޒު ވިދާޅުވީ، ދުންފަތް ކޮންޓްރޯލް ކުރުމާބެހޭ ޤާނޫނަށް މިފަހުން ގެނައި އިސްލާހުތަކާއި ގުޅިގެން ސުވާލު އުފެދުމާއެކު، ރޯލިން ޓޮބޭކޯގެ ޝިޕްމަންޓެއް ވަނީ ހިފަހައްޓާފައެވެ. ނަމަވެސް ދެ ހަފުތާއަށްފަހު އެ ޝިޕްމަންޓް ދޫކޮށްލާފައި ވަނީ ޤާނޫނަކުން އެފަދަ ތަކެތި ރާއްޖެ އެތެރެކުރުން މަނާކޮށްފައި ނެތުމުން ކަމަށް ނިޔާޒު ވިދާޅުވިއެވެ.

"އާންމު އުސޫލުން ވެސް މުދަލެއް ރާއްޖެ އެތެރެކުރެވޭތޯ ނުވަތަ ނޫންތޯ، ޝައްކު އުފެދޭ ހާލަތެއްގައި އަޅުގަނޑުމެން ހިފަހައްޓަން. ހިފަހައްޓާފައި އެބަބަލަން، އެއްވެސް ޤާނޫނަކާއި ތައާރުޒުވޭތޯ، ނުވަތަ ސަރުކާރުގެ އެއްވެސް އިދާރާއެއްގެ ޤާނޫނަކާއި އެކަމާއި ތައާރުޒުވޭތޯ. ބެލުމަށްފަހު ވަރަށް ބޮޑަށް ޔަގީންކުރުމަށްފަހު އަޅުގަނޑުމެން މި ދޫކޮށްލަނީ." ނިޔާޒު ވިދާޅުވިއެވެ.

ދުންފަތް ކޮންޓްރޯލްކުރުމާބެހޭ ޤާނޫނަށް ނިމިދިޔަ އަހަރުގެ ނޮވެމްބަރު މަހު ގެނައި އިސްލާހުގައި ވަނީ ރާއްޖޭގައި އެއްވެސް މިންވަރަކަށް ދުންފަތުގެ ބާވަތެއް އުފެއްދުމަކީ މަނާކަމެއްކަމަށް ބަޔާންކޮށްފައެވެ. ނަމަވެސް އެފަދަ ތަކެތި އެތެރެކުރުން އަދި ޤާނޫނަކުން މަނާކޮށްފައި ނުވާ ކަމަށް ކަސްޓަމްސްއިން ފާހަގަކުރިއެވެ.

މި ވަގުތު ރާއްޖެއަށް އެތެރެކުރުން ޤާނޫނަކުން މަނާކޮށްފައިވަނީ ވޭޕާއި، އީ-ސިނގިރޭޓުފަދަ ތަކެއްޗާއި އެތަކެތީގެ ބައިތައް ކަމަށް ކަސްޓަމްސްއިން ބުންޏެވެ.

ކަސްޓަމްސްއަކީ ޤާނޫނު ތަންފީޛުކުރާ އިދާރާއެއްކަން ފާހަގަކުރައްވައި، އަހުމަދު ނިޔާޒު ވިދާޅުވީ ކަސްޓަމްސްއިން އަބަދުވެސް އަމަލުކުރަނީ ޤާނޫނާއި އެއްގޮތަށެވެ.