ދިވެހިރާއްޖޭގެ ބޯޑަރު ބެލެހެއްޓުމާއި، ގާނޫނީ މަސްއޫލިއްޔަތުތައް އަދާކުރުމަށް މޯލްޑިވްސް ކަސްޓަމްސް ސާވިސްއިން ކުރަމުންދާ މަސައްކަތްތަކާ މެދު ރައްޔިތުންގެ މެދުގައި ޝައްކު އުފައްދައި، ނުރަނގަޅު ތަސައްވުރެއް އުފެދޭ ގޮތަށް އެއްވެސް ފަރާތަކުން އަމަލު ނުކުރުމަށް އެ މުއައްސަސާއިން ހަރުކަށިކޮށް އިލްތިމާސްކޮށްފިއެވެ.
ކަސްޓަމްސްއިން ނެރުނު ރަސްމީ ނޫސްބަޔާނެއްގައި މިފަދައިން އިލްތިމާސް ކުރީ، ވެލާނާ އިންޓަނޭޝަނަލް އެއާޕޯޓުގެ ޓާމިނަލް އެރައިވަލްގައި ގާނޫނީ ވާޖިބު އަދާކުރަމުންދިޔަ އަންހެން މުވައްޒަފެއްގެ ފޮޓޯއާއި ހަގީގަތާ ހިލާފު ވާހަކަތަކެއް ސޯޝަލް މީޑިއާގައި އާންމުކޮށް، ފިތުނަ އުފެއްދުމަށް ބަޔަކު ކުރި މަސައްކަތްތަކާ ގުޅިގެންނެވެ.
އެ ބަޔާނުގައި ކަސްޓަމްސްއިން ވަނީ، ރާއްޖެއަށް އެތެރެކުރާ މުދަލާއި، ފަސިންޖަރުން އަދި ރާއްޖެއިން ބޭރުން އަންނަ އުޅަނދުފަހަރު ބަލައި ފާސްކުރުމަކީ ކަސްޓަމްސް ގާނޫނުގެ ދަށުން އެ ސާވިސްއާ މަތިކޮށްފައިވާ ދައުލަތުގެ އެންމެ މުހިންމު އެއް ޒިންމާކަން ހަނދާންކޮށްދީފައެވެ.
Advertisement
ބޯޑަރުގެ ސަލާމަތްތެރިކަން ކަށަވަރުކުރުމަށްޓަކައި ބަނދަރުތަކުގައި ގާއިމްކޮށްފައިވާ ޒަމާނީ ވަސީލަތްތައް ބޭނުންކުރަމުންދާ ކަމަށާއި، ކަސްޓަމްސްއަށް ލިބޭ އިންޓެލިޖެންސް މައުލޫމާތާއި ހޯދުންތަކަށް ރިޔާއަތްކޮށް ފިޒިކަލީ ބަލައި ފާސްކުރަންޖެހޭ ފަރާތްތައް ފާސްކުރަމުންދަނީ ކަނޑައެޅިފައިވާ ގާނޫނާއި ގަވާއިދާ އެއްގޮތްވާ ގޮތުގެ މަތީން ކަމަށްވެސް ބަޔާނުގައިވެއެވެ.
ދިވެހިރާއްޖޭގެ ބޯޑަރު ސަރަހައްދުގައި ގައުމީ ސަލާމަތް ރައްކާތެރިކުރުމަށް ކުރަންޖެހޭ އެންމެހައި ކަންކަން ކަސްޓަމްސްއިން ކުރަމުންދަނީ ބައިނަލްއަގުވާމީ އުސޫލުތަކާއި ހެދިފައިވާ ގަވާއިދުތަކުގެ އިމުގެ ތެރެއިން ކަމަށް ސަރުކާރުގެ މުއައްސަސާއިން ޔަގީންކޮށްދެއެވެ. އެހެންކަމުން، މުވައްޒަފުންގެ އަގުވެއްޓޭ ގޮތަށް ފޮޓޯ އާންމުކުރުމާއި، ދައުލަތުގެ މުހިންމު މަސައްކަތްތަކާމެދު ރައްޔިތުންގެ ހިތްތަކުގައި ނުތަނަވަސްކަން އުފެއްދުމަށް ކުރާ މިފަދަ ނޭދެވޭ އަމަލުތަކުން އެންމެހައި ފަރާތްތަކުން ދުރުހެލިވުމަށް ކަސްޓަމްސްއިން ވަނީ ނަސޭހަތްތެރިވެފައެވެ.
