ކަނޑުމަގުން ރާއްޖެއަށް އެތެރެކުރި މުދާ ޝިޕްމަންޓެއްގެ ތެރޭގައި ފޮރުވައިގެން ގެނައި 15,600 އަށް ވުރެ ގިނަ ވޭޕް ކާޓްރިޖް މޯލްޑިވްސް ކަސްޓަމްސް ސަރވިސްއިން އަތުލައިގެންފިއެވެ. މިއީ ވޭޕާއި އިލެކްޓްރޯނިކް ސިނގިރޭޓް ރާއްޖެއަށް އެތެރެކުރުން މަނާކުރުމަށް ސަރުކާރުން ނިންމި ފަހުން، މިހާތަނަށް އަތުލައިގަނެވުނު އެންމެ ބޮޑު ޝިޕްމަންޓް ކަމަށް ކަސްޓަމްސްއިން ބުނެއެވެ.

ކަސްޓަމްސްއިން ހާމަކުރި ގޮތުގައި މި ތަކެތި އަތުލައިގެންފައިވަނީ ކޮމާޝަލް ހާބަރުގައި އިއްޔެ ހިންގި ހާއްސަ އޮޕަރޭޝަނެއްގައެވެ. "ޖެނެރަލް ކާގޯ" ނުވަތަ އާންމު މުދަލުގެ ގޮތުގައި ޑިކްލެއާކޮށްފައިވާ މި ޝިޕްމަންޓް ބަލައި ފާސްކުރިއިރު، އޭގެ ތެރޭގައި ފޮރުވާފައިވާ 15,601 ވޭޕް ކާޓްރިޖް ފެނިފައިވެއެވެ. މި ޝިޕްމަންޓް ރާއްޖެއަށް އެތެރެކޮށްފައިވަނީ ހުސައިން ފަޔާޒް ކިޔާ މީހެއްގެ ނަމުގައެވެ.

މިދިޔަ ފަސް ދުވަހުގެ ތެރޭގައި ކަސްޓަމްސްއިން ހިންގި ތިން އޮޕަރޭޝަނެއްގައި ޖުމްލަ 22,309 ވޭޕް ކާޓްރިޖް ވަނީ އަތުލައިގެންފައެވެ. އޭގެ ތެރޭގައި މިދިޔަ ބުދަ ދުވަހު އަތުލައިގަތް 5,600 ވޭޕް ކާޓްރިޖާއި، ޕޮޓޭޓޯ ޗިޕްސް ދަޅުތަކާއި ޗޮކްލެޓް ޕައުޑަރު ޕެކެޓުތަކެއްގެ ތެރޭގައި ފޮރުވައިގެން އެތެރެކުރަން އުޅުނު 1,108 ކާޓްރިޖް ހިމެނެއެވެ.

މިކަމާ ގުޅިގެން އިތުރަށް ބެލި ބެލުމުން އެނގިފައިވާ ގޮތުގައި، މީގެ ކުރިން 5,600 ވޭޕް ކާޓްރިޖް އެތެރެކުރި ކުންފުންޏަކީ ކުރީގެ ރައީސް އިބްރާހީމް މުހައްމަދު ސާލިހުގެ އަނބިކަނބަލުން ފަޒްނާ އަހުމަދުގެ އާއިލީ މަސްލަހަތު އޮންނަ "ޕޭން-އޯޝަން އިންޓަރނޭޝަނަލް ޕްރައިވެޓް ލިމިޓެޑް" އެވެ. މި ކުންފުންޏަކީ ފަޒްނާ އާއި އެކަމަނާގެ ބައްޕަގެ ހިއްސާ އޮންނަ "ޝައިން ޓްރީ ހޯލްޑިންގްސް" ގެ 100 އިންސައްތަ ހިއްސާ އޮންނަ ކުންފުންޏެކެވެ.

މި ސަރުކާރުން ވަނީ 15 ނޮވެމްބަރު 2024 އިން ފެށިގެން ރާއްޖެއަށް ވޭޕް އެތެރެކުރުން މަނާކޮށް، 15 ޑިސެމްބަރު 2024 އިން ފެށިގެން ވޭޕް ބޭނުންކުރުމާއި ގެންގުޅުންވެސް މަނާކޮށްފައެވެ. ދުންފަތް ކޮންޓްރޯލްކުރުމާ ބެހޭ ގާނޫނަށް ގެނައި މި ބަދަލާއެކު، ގަވާއިދާ ހިލާފަށް ވޭޕް އެތެރެކުރާ ފަރާތްތައް ބޮޑެތި އަދަދުތަކުން ޖޫރިމަނާ ކުރަން ވަނީ ކަނޑައަޅާފައެވެ.