ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މާޅޮސްމަޑުލު އުތުރުބުރީ (ރ) އަތ) އަތޮޅަށް ކުރައްވަމުންދާ ދަތުރުފުޅުގެ އެންމެ ފަހު މަންޒިލްގެ ގޮތުގައި މިއަދު ވަޑައިގަންނަވަނީ އިންނަމާދޫއަށެވެ.

އިންނަމާދޫން މަޢުލޫމާތު ލިބިފައިވާ ގޮތުގައި ރައީސް ވަޑައިގަންނަވަންވާއިރަށް އެރަށް މިހާރު އޮތީ ޒީނަތްތެރިކޮށްފައެވެ.

“އަޅުގަނޑުމެން މިތިބީ ރައީސް ވަޑައިގަންނަވަންވާއިރަށް ތައްޔާރުވެގެން. އިރާދަކުރެއްވިއްޔާ މިފަހަރު މިރަށުގައި ޕޮލިސް ސްޓޭޝަނަކާއި ކައުންސިލް އިދާރާގެ އާ ޢިމާރާތް ބިންގާ އަޅައިދެއްވާނެ ކަމުގެ އުފާވެރި މަންޒަރު ފެންނާނެ. އެ ޚަބަރު ދިވެހި ރައްޔިތުންނަށް ލިބޭނެ” އިންނަމާދޫ ކައުންސިލުން ބުންޏެވެ.

ރައީސްގެ މި ދަތުރުފުޅުގައި މިއަދު ވަނީ ހުޅުދުއްފާރު، މަޑުއްވަރީ އަދި ރަސްމާދޫއަށް ވަޑައިގެން އެ ރަށްރަށުގެ ތަރައްޤީއަށް ގިނަ މަޝްރޫޢުތަކެއް އިޢުލާންކުރައްވާފައެވެ.

އިންނަމާދޫ ކައުންސިލުން ބުނީ އެރަށުގައި އަލަށް އިމާރާތްކުރެވޭ ފުލުހުންގެ މަރުކަޒާއި ކައުންސިލް އިމާރާތުގެ ބިންގާ އަޅުއްވައިދެއްވުމުގެ އިތުރުން، އެރަށުގެ ވޮލީކޯޓު ރަސްމީކޮށް ހުޅުއްވައިދެއްވާނެއެވެ.