ރާއްޖޭގެ ތާރީޚުގައި، ލާމަރުކަޒީ ނިޒާމުގެ ސަފުހާ ތަކުގައި ރައީސް ޑރ. މުހައްމަދު މުއިއްޒުގެ ނަން ލިޔެވޭނީ ރަން އަކުރުން ކަމަށް ސިޓީސް، ލޯކަލް ގަވަރމަންޓް އެންޑް ޕަބްލިކް ވަރކްސް މިނިސްޓަރު އާދަމް ޝަރީފް އުމަރު ވިދާޅުވެއްޖެއެވެ.

މިނިސްޓަރު އާދަމް ޝަރީފް މިހެން ވިދާޅުވެފައި ވަނީ 55 ރަށެއްގެ ކައުންސިލް އިމާރާތް ކުރުމަށް މެލޭޝިޔާގެ ކުންފުންޏަކާ އެކު އެއްބަސްވުމުގައި ސޮއި ކުރުމަށް ފަހު އެކްސްގައި ކުރެއްވި ޕޯސްޓެއްގައެވެ. މިނިސްޓަރު ވިދާޅުވީ އިއްޔެއަކީ ތާރީޚީ ދުވަހެއް ކަމަށެވެ. އޭގެ ސަބަބަކީ ބޮލަށް ވެއްޓޭ ވަރަށް ހަލާކު ވެފައިވާ ކައުންސިލް އިދާރާ ތަކުގެ ބަދަލުގައި އައު ކައުންސިލް އިދާރާ ތަކެއް ބިނާކުރުމުގެ މަޝްރޫޢުގެ އެއްބަސްވުމުގައި ސޮއި ކުރެވުނު ދުވަސް ކަމަށް ވާތީއެވެ.

މިނިސްޓަރު އާދަމް ޝަރީފް ވިދާޅުވީ ކައުންސިލް ތައް އުމްރާނީ ގޮތުން ތަރައްޤީ ކުރެއްވުމަށް ރައީސް މުއިއްޒު ވެވަޑައިގެންނެވި ވަޢުދު ފުއްދަވާނެކަން މިއަދު ހާމަވެއްޖެ ކަމަށެވެ. އަދި މިކަމުގެ ސަބަބުން ރައީސް މުއިއްޒުގެ ނަން ތާރީޚުގައި ލިޔެވިގެންދާނީ ރަން އަކުރުން ކަމަށްވެސް އާދަމް ޝަރީފް އުމަރު ވިދާޅުވިއެވެ.

މިނިސްޓަރު އާދަމް ޝަރީފް ވިދާޅުވީ ކައުންސިލް އިމާރާތް އެޅުމަށް އިއްޔެ ސޮއިކުރި އެއްބަސްވުމުގެ ދަށުން 55 ކައުންސިލް އިދާރާ ފަރުނީޗަރާ އެކު ޤާއިމު ކުރެވޭނެ ކަމަށެވެ. މީގެ ތެރޭގައި ދެ ބުރިއަށް އިމާރާތްކުރާ 27 ކައުންސިލް އިދާރާ ހިމެނޭ ކަމަށާއި، ދެ ބުރިއަށް އިމާރާތްކުރާ ކައުންސިލް އިދާރާތައް މަސައްކަތް ފަށާތާ 18 މަސްދުވަހުގެ ތެރޭގައި އަދި އެއް ބުރީގެ ޢިމާރާތް ތައް މަސައްކަތް ފަށާތާ އެއް އަހަރު ދުވަހުގެ ތެރޭގައި ނިންމޭނެ ކަމަށް އުންމީދުކުރާ ކަމަށްވެސް ވިދާޅުވިއެވެ.

މި މަޝްރޫޢުގެ އަގަކީ 36 މިލިއަން ޑޮލަރު ކަމަށް މިނިސްޓަރު ވިދާޅުވިއެވެ. އަދި މި 55 ކައުންސިލްގެ އިތުރުން ރައީސުލްޖުމްހޫރިއްޔާ ވަނީ އިތުރު 50 ކައުންސިލް އިދާރާ އެޅުއްވުމުގެ މަޝްރޫޢެއް އިޢުލާން ކުރައްވާފައި ކަމަށާއި، ޗައިނާގެ އެހީގައި އަޅުއްވާ އެ ކައުންސިލް އިދާރާ ތަކުގެ ޢަމަލީ މަސައްކަތް މި އަހަރު ފެށޭނެ ކަމަށް ވެސް އާދަމް ޝަރީފް އުމަރު ވިދާޅުވިއެވެ.