ކްރިކެޓް ބޯޑް އޮފް މޯލްޑިވްސް (ސީބީއެމް) އިން އިންތިޒާމުކޮށްގެން ފުރަތަމަ ފަހަރަށް އާންމުންނަށް ހުޅުވާލައިގެން އިންޑޯ ކްރިކެޓު މުބާރާތަކާއި ޓޭޕްބޯލް ކްރިކެޓު މުބާރާތެއް ބޭއްވުމަށް ނިންމައި، މި ދެ މުބާރާތް ރާވާ ހިންގައިދޭނެ ފަރާތެއް ހޯދުމަށް އިއުލާނުކޮށްފިއެވެ.

ސީބީއެމްގެ މައުލޫމާތު ދޭ ގޮތުގައި މިއަހަރު އެ ބޯޑުން ރާވައި ހިންގާ މުބާރާތްތަކުގެ ތެރެއިން މި ދެ މުބާރާތަކީ ޚާއްސަ އިސްކަމެއްދޭ ދެ މުބާރާތެވެ. އާންމުންނަށް ހުޅުވާލައިގެން ކުރިއަށްގެންދާ މި ދެ މުބާރާތުގެ ތެރެއިން އިންޑޯ ކްރިކެޓު މުބާރާތް އިންތިޒާމުކުރުމުގެ ފުރުސަތު ހުޅުވާލާފައިވަނީ ރާއްޖޭގައި ތިބި ކޮލިފައިޑް އޯގަނައިޒޭޝަންތަކަށާއި އަމިއްލަ ފަރަތްތަކަށެވެ.

ސީބީއެމްގެ "ކްރިކެޓް ފޯ އޯލް ޕްރޮގްރާމް" ގެ ދަށުން ބާއްވާ އިންޑޯ ކްރިކެޓު މުބާރާތަކީ ސީބީއެމްގެ ކަލަންޑަރުގައި ހިމެނޭ މުހިންމު މުބާރާތެކެވެ. މި މުބާރާތް ބޭއްވުމުގެ މަގުސަދަކީ އިންޑޯ ކްރިކެޓް ކުރިއެރުވުމާއި ކްރިކެޓް ކުޅުމުގެ އިތުރު ފުރުސަތުތައް ތަނަވަސްކޮށްދިނުމެވެ. އަދި ވީހާވެސް ގިނަ އާންމުންނަށް ކްރިކެޓު ކުޅުމުގެ މަގު ފަހިކޮށްދިނުންވެސް ހިމެނެއެވެ.

ގައުމީ ފެންވަރުގައި ބާއްވާ ފުރަތަމަ ޓޭޕްބޯލް މުބާރާތް ހިންގުމުގެ ފުރުސަތުވެސް ހުޅުވާލާފައިވަނީ އެކަމަށް ގާބިލު ޖަމުއިއްޔާތަކާއި އަމިއްލަ ފަރުދުންނަށެވެ. މި މުބާރާތަކީ ރާއްޖޭގެ އެކި ކަންކޮޅުތަކުގައި ކްރިކެޓް މަގުބޫލުކޮށް، މުޖުތަމައުގެ ބައިވެރިވުން އިތުރުކޮށް، ކްރިކެޓަށް އިތުރު ކުޅުންތެރިން ގެނައުމުގެ މަގްސަދުގައި ބާއްވާ ބޮޑު މުބާރާތެއްގެ ގޮތުގައި ސީބީއެމް އިން ދެކެއެވެ.

އިންޑޯ ކްރިކެޓު މުބާރާތް ބާއްވާނެ ތާރީޚެއް އަދި ހާމަކޮށްފައެއް ނުވެއެވެ. ނަމަވެސް ގައުމީ ޓޭޕްބޯޅަ ކްރިކެޓު މުބާރާތް ބާއްވަން ތާވަލުކޮށްފައިވަނީ މިއަހަރުގެ ސެޕްޓެމްބަރު މަހުގެ ތެރޭގައެވެ.