ކްރިކެޓް ބޯޑް އޮފް މޯލްޑިވްސް (ސީބީއެމް) އިން އިންތިޒާމުކޮށްގެން ބޭއްވި "މޯލްޑިވްސް ޓީ10 ސްމޭޝް" ގެ ޗެމްޕިއަންކަން ސީބީއެލް ސްޕޯޓްސްއިން ހޯދައިފިއެވެ.

ކުޅިވަރު އެކުވެނީގެ ކްރިކެޓް ދަނޑުގައި މިއަދު ހަވީރު ކުޅުނު ފައިނަލް މެޗުގައި ސީބީއެލް އިން ކާމިޔާބުކޮށްފައިވަނީ އެމްއެސް ހެލްޕިން ހޭންޑް ސްޕޯޓްސް އެކެޑަމީއާ ވާދަކޮށް 57 ލަނޑުންނެވެ.

މި މެޗުގެ ގުރު ދިމާވުމުން ސީބީއެލް އެންމެ ފުރަތަމަ ކުޅެން އަރައި 10 އޯވަރުގެ ތެރޭގައި ތިން ކުޅުންތެރިން ނުބައިވެގެން ވަނީ 123 ލަނޑު ހަދާފައެވެ. އެ ޓީމުން އެންމެ ރަނގަޅަށް ކުޅުނީ ނުބައިނުވެ 36 ބޯޅައިން 82 ލަނޑު ހެދި ތާރަކަ ރުވާން އާއި 15 ބޯޅައިން 25 ލަނޑު އެއްކުރި ހަރުޝަ އަމަރަސިންހައެވެ. 

ޖަވާބުގައި އެމްއެސް ހެލްޕިން ހޭންޑް ކުޅެން އަރައި 10 އޯވަރު ހަމަވިއިރު ފަސް ކުޅުންތެރިން ނުބައިވެގެން ހެދިފައިވަނީ 66 ލަނޑެވެ. މި އިނިންގްސްގައި އެންމެ ރަނގަޅަށް އުކާފައިވަނީ 7 ލަނޑަށް ދެ ވިކެޓް ނެގި ތާރަކައެވެ. މި މެޗުގެ އެންމެ މޮޅު ކުޅުންތެރިއަކަށްވެސް ހޮވުނީ އޭނާއެވެ.

މި މުބާރާތުގެ އެންމެ ގިނަ ލަނޑު ހެދި ކުޅުންތެރިޔާގެ މަގާމާއި، ހުރިހާ ގޮތަކުން އެންމެ މޮޅު ކުޅުންތެރިއަކަށް ހޮވުނީ ސީބީއެލްގެ ތާރަކައެވެ. އަދި އެންމެ ގިނަ ވިކެޓް އަޙްމަދު އަމީލް އާއި ތަރިންދު ނެގިއިރު، އެންމެ ގިނަ ބޯޅަ ހިފާފައިވަނީ އޮފް އެފްސީގެ ޒިޔާއުލްއެވެ.

މި މުބާރާތުގެ ފައިނަލް މެޗުގެ ކުރިން މިއަދު ހެނދުނު ވަނީ ދެ މެޗެއް ކުޅެފައެވެ. އެގޮތުން ފުރަތަމަ މެޗުގައި ވެސްޓް ސްޕޯޓްސް ކުލަބާ ބައްދަލުކޮށް ފުވައްމުލައް ކްރިކެޓް އެކެޑަމީން ވަނީ 12 ލަނޑުން މެޗު ކާމިޔާބުކޮށްފައެވެ. އަދި ދެވަނަ މެޗުގައި ބީޖީ ސްޕޯޓްސް އަތުން މާލޭ ސްޕޯޓްސް ކުލަބު ވަނީ 17 ލަނޑުން މޮޅުވެފައެވެ.