ރައީސް ޑރ. މުޙައްމަދު މުޢިއްޒުގެ ވައުދުފުޅާ އެއްގޮތަށް، މި އަހަރުގެ ރޯދަމަހު ގޭބިސީތަކަށް ހިލޭ މަސްދަޅު ލިބޭނެ ކަމަށާއި، މަސްދަޅުން 40 ގްރާމް މަސް އުންޏެއް ނުވާނެކަމަށް މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ (މިފްކޯ) އިން ހާމަކުރައްވައިފިއެވެ.

މިފްކޯއިން މިކަން ހާމަކުރެއްވީ، ސޯޝަލް މީޑިއާގައި ފެތުރެމުންދާ ބައެއް މަޢުލޫމާތުތަކާއި ގުޅިގެންނެވެ. މިފްކޯއިން ވިދާޅުވީ، ފަތުރަމުންދަނީ ދޮގު ވާހަކަތަކެއް ކަމަށާއި، ރޯދަމަހު ބަހާ މަސްދަޅުން 40 ގްރާމް މަސް އުނި ނުވާނެކަމުގެ ޔަގީންކަން ދެއްވިއެވެ.

"140 ގްރާމުގެ މަސްދަޅު ބާޒާރަށް ނެރުނީ ކުދި ގޭބިސީތަކަށް އަދި އެއްފަހަރު ބޭނުންކުރެވޭ އެއްޗެއްގެ ގޮތުގައި. މަސްދަޅު ފްރިޖުކުރުމަކީ ރަނގަޅު ކަމަކަށް ނުވާތީ،" މިފްކޯއިން ނެރުނު ބަޔާނުގައި ބުނެފައިވެއެވެ.

މީގެ ކުރިން މިފްކޯއިން ވިދާޅުވެފައިވަނީ، ކޮންމެ ގޭބިސީއަކަށް ދޭން ނިންމާފައިވަނީ 48 ދަޅުގެ މަސްކޭހެއް ކަމަށެވެ.

ފާއިތުވި އަހަރުގެ ނޮވެމްބަރު މަހު، ސަރުކާރަށް އެއް އަހަރު ފުރުން ފާހަގަކުރުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުން ރައީސް މުޢިއްޒު ވިދާޅުވެފައިވަނީ، ކުރިއަށް އޮތް ރޯދަމަހު ކާޑުގެ ބަދަލުގައި ގޭގެއަށް ދޫކުރާނީ މަސްދަޅު ކޭސް ކަމަށެވެ. މިއީ ރައީސްގެ ވައުދުފުޅެކެވެ.

ފާއިތުވި އަހަރުގެ ރޯދަމަހު، ސަރުކާރުން ވަނީ ހިލޭ ކާބޯތަކެތި ގޭބިސީތަކަށް ދެއްވާފައެވެ. އޭގެ ތެރޭގައި ހަނޑޫ އަދި ފުށް ހިމެނެއެވެ. ނަމަވެސް މި އަހަރު އެ ބަދަލުކޮށް، މަސްދަޅު ކޭހެއް ދެއްވުމަށް ވަނީ ނިންމަވާފައެވެ.