މަސްވެރިން އަތުން މަސްގަންނަ އަގު މިހާރު ހުރި މިންވަރަށްވުރެ ދަށްނުކޮށް، ކުންފުނީގެ ހިންގުން ހަރުދަނާކުރުމަކީ މިފްކޯގެ އެންމެ ބޮޑު އަމާޒުކަމަށް އެ ކުންފުނީގެ ސީއީއޯ މުހައްމަދު އަނަސް ވިދާޅުވެއްޖެ އެވެ.

މިފްކޯގެ ހިންގުމާ ދާދިފަހުން ހަވާލުވެވަޑައިގެންނެވި އަނަސް މިހެން ވިދާޅުވީ، ކަނޑުއޮތްގިރީގެ އައިސްޕްލާންޓާއި މަސް ކާރުހާނާ ހުޅުވުމަށް ބޭއްވި ރަސްމިއްޔާތަށްފަހު މީޑިއާތަކާ ވާހަކަދައްކަވަމުންނެވެ. އަނަސް ވިދާޅުވީ ކުންފުނީގެ ހިންގުން ހަރުދަނާކުރުމުގެ އަމަލީ މަސައްކަތްތައް މިހާރު ފަށާފައިވާ ކަމަށެވެ.

ރާއްޖެއަށް ބޭރުފައިސާ ވައްދާ މައިގަނޑު އެއް ސިނާއަތްކަމަށްވާ މަސްވެރިކަމުގެ ދާއިރާގައި ހަރަކާތްތެރިވާ ދައުލަތުގެ މަސްކުންފުނި ހަރުދަނާކުރުމަށް ގެންގުޅުއްވާ ތަސައްވުރު ހާމަކުރައްވަމުން އަނަސް ވިދާޅުވީ، ސަރުކާރަށް ބަރޯސާނުވެ ކުންފުނި އަމިއްލަ ފައިމައްޗަށް ތެދުވެ ހިންގުމުގެ ޤާބިލްކަން ގާއިމްކުރުމަށް މަސައްކަތް ކުރައްވަމުން ގެންދަވާ ކަމަށެވެ. މިގޮތުން އޮޕަރޭޝަނަލް އެކްސެލެންސް ނުވަތަ ހިންގުމުގެ އެންމެ މަތީ ފަންތިއަށް ވާސިލުވެވޭނެ ގޮތަށް މަސްގަތުމުގެ ކަންކަން ބައްޓަންކުރުމަކީ މުހިންމު އަމާޒެއްކަން އަނަސް ފާހަގަކުރެއްވި އެވެ.

"މިހާރު އަޅުގަނޑުމެންގެ އެންމެ ބޮޑު އަމާޒަކީ އޮޕަރޭޝަނަލް އެކްސެލެންސް ގެނެވޭނެ ގޮތްތަކަށް އަޅުގަނޑުމެން މަސްގަތުން. އަޅުގަނޑުމެން އެންމެ ކޮސްޓް އިފެކްޓިވްކޮށް އޮޕަރޭޝަންސް ރާވާ، އަދި ޚާއްސަކޮށް މިހާރު މަހުގެ އަގު އެހެރި 20 ރުފިޔާގެ އަގުގައި ހިފަހައްޓާ، އެ ލެވެލްގައި މަހުގެ އަގު ހިފަހައްޓާ، އޮޕަރޭޝަނަލީ އަޅުގަނޑުމެން ސްޓްރެޓެޖިކަލީ އިމްޕްރޫވް ކޮށްގެން މަސްވެރިންނަށް ހަމަ އަގު ލިބޭނެ ގޮތަށް މިފްކޯގެ ހިންގުން ހަރުދަނާ ކުރުން،" އަނަސް ވިދާޅުވި އެވެ.

މިދިޔަ ޖޫން މަހުގެ ކުރީކޮޅުން ފެށިގެން މިފްކޯއިން މަސްވެރިން އަތުން މަސްގަންނަ އަގު ވަނީ 20 ރުފިޔާއަށް ބަދަލުކޮށްފަ އެވެ. މި އަގުގައި މިފްކޯގެ ހުރިހާ އުޅަނދުތަކަކުންނާއި ބަނދަރުތަކުން މަސް ގަނެވޭނެ އިންތިޒާމު މިހާރު ވަނީ ހަމަޖައްސާފަ އެވެ.

މިފްކޯއިން މަހުގެ އަގު ކަނޑައެޅުމުގައި މިހާރު ގެންގުޅެނީ 'ފްލޯޓިން ޕްރައިސް' ނުވަތަ ބައިނަލްއަގުވާމީ ބާޒާރުގައި މަހުގެ އަގަށް އަންނަ ބަދަލުތަކަށް ރިޢާޔަތްކޮށް އަގު ކަނޑައަޅާ އުސޫލެކެވެ. ހާއްސަކޮށް، އިނގިރޭސިވިލާތުން ދިވެހި މަހުގެ އުފެއްދުންތަކުން ނަގަމުންދިޔަ ޑިއުޓީ ކަނޑާލުމާ ގުޅިގެން ލިބުނު ފުރުސަތުތަކާއެކު، މަސްވެރިންނަށް އެންމެ ފައިދާހުރި ގޮތަށް އަގުތައް ބައްޓަންކުރުމަށް މިފްކޯއިން އަންނަނީ މަސައްކަތް ކުރަމުންނެވެ.