"އޮޕަރޭޝަން ކުރަނގީ"ގެ ދަށުން ބިދޭސީންގެ މަޢުލޫމާތު އެއްކުރުމުގެ ބޮޑު ހަރަކާތެއް މިއަދު މާލެ ސަރަޙައްދުގައި މިއަދު ދާޚިލީ ސަލާމަތާއި ފަންނިއްޔާތާ ބެހޭ ވުޒާރާއިން ފަށައިފިއެވެ..

ދާޚިލީ ސަލާމަތާއި ފަންނިއްޔާތާ ބެހޭ ވުޒާރާއިން ބުނާ ގޮތުގައި މި ހަރަކާތް މިއަދު ހެނދުނު 8 އިން ފެށިގެން އިރުއޮއްސި 6 ޖެހުމާއި ހަމައަށް ކުރިއަށްދާނެއެވެ. މި އޮޕަރޭޝަނުގައި އެ ވުޒާރާގެ 75 އޮފިޝަލުން ބައިވެރިވާނެ ކަމަށް ވެސް އެ ވުޒާރާއިން ބުނެފައިވެއެވެ.

މިއަދުގެ ހަރަކާތުގައި ތަޢުލީމީ ދާއިރާގައި މަސައްކަތްކުރާ ބިދޭސީންގެ އިތުރުން ބޮޑެތި ބައެއް ކުންފުނިތަކުގެ ބިދޭސީ މަސައްކަތްތެރިންގެ މަޢުލޫމާތު އެއްކުރުމަށް ހަމަޖެހިފައިވާ ކަމަށް ވުޒާރާއިން ބުނެފައިވެއެވެ. މާލޭގެ އިތުރުން ތިލަފުއްޓާއި ގުޅީފަޅުގައި ވެސް އެ ވުޒާރާގެ ޓީމުތައް ހަރަކާތްތެރިވާނެއެވެ.

މި ހަރަކާތުގެ ތެރެއިން ބިދޭސީ މަސައްކަތްތެރިން ސްކްރީންކުރުމުގެ މަސައްކަތް އެ ވުޒާރާގެ އެންޓިޓިޕް އޮފީހުން ކުރިއަށްގެންދާނެ ކަމަށް ވެސް ވުޒާރާއިން ބުނެފައިވެއެވެ.

"އޮޕަރޭޝަން ކުރަނގި" ގެ ދަށުން މިހާތަނަށް 21,000 އަށްވުރެ ގިނަ ބިދޭސީންގެ ބަޔޯމެޓްރިކް ޑޭޓާ އެއްކޮށްފައިވާ ކަމަށް ވުޒާރާއިން ބުނެފައިވެއެވެ. އަދި 185 ރަށެއްގައި މި މަސައްކަތް ފަށައި، 55 ރަށެއްގައި މި މަސައްކަތް ނިންމާފައިވާ ކަމަށް ވެސް ވުޒާރާއިން ވަނީ މީހެ ކުރިން ބުނެފައެވެ..

މިއަދު ބޮޑު ހަރަކާތެއް ހިންގާއިރު އާޓިފިޝަލް ބީޗުގައި ބިދޭސީންތަކެއް މާރާމާރީ ހިންގައި ދިވެއްސަކަށް އަނިޔާދިން މައްސަލަ ވެސް ދަނީ ތަޙްޤީޤު ކުރަމުންނެވެ.