މިނިސްޓްރީ އޮފް ހޯމްލޭންޑް ސެކިއުރިޓީ، ލޭބަރ އެންޑް ޓެކްނޮލޮޖީގެ ސްޓޭޓް މިނިސްޓަރުގެ މަގާމުގައި ހުންނެވި ޑރ. އަބްދުﷲ ފައިރޫޝް، މަގާމުން އިސްތިއުފާ ދެއްވައިފިއެވެ.
ޑރ. ފައިރޫޝް އިސްތިއުފާ ދެއްވިކަން އިއުލާނު ކުރެއްވީ މިއަދު ހެނދުނުގެ ވަގުތެއްގައި އެކްސް މެދުވެރިކޮށް ކުރެއްވި ޕޯސްޓެއްގައެވެ. އޭނާ ވިދާޅުވީ، ވަރަށް ފުންކޮށް ވިސްނެވުމަށްފަހު މަގާމުން އިސްތިއުފާ ދެއްވުމަށް ނިންމެވީ ކަމަށާއި، މިއީ އޭނާގެ ދައުލަތުގެ ހިދުމަތުގެ މި ބާބު ނިންމާލުމަށް އެންމެ ރަނގަޅު ވަގުތު ކަމަށް ގަބޫލުކުރައްވާ ކަމަށެވެ. އަދި ދައުލަތަށް ހިދުމަތް ކުރުމުގެ ފުރުސަތު ލިބިވަޑައިގަތުމުން އެކަމަށްޓަކައި ޝުކުރު އަދާކުރައްވައި، މަސައްކަތުގައި އެކުގައި އުޅުއްވި މުވައްޒަފުންނާއި މުއައްސަސާތަކަށްވެސް ޝުކުރު އަދާކުރެއްވިއެވެ.
Advertisement
ޑރ. ފައިރޫޝް ހޯމްލޭންޑް ސެކިއުރިޓީގެ ސްޓޭޓް މިނިސްޓަރު ކަމަށް އައްޔަން ކުރެއްވީ އޮކްޓޯބަރު 2024 ގައެވެ. އޭގެ ކުރިން އޭނާ ވަނީ މިނިސްޓްރީ އޮފް ހަޔަރ އެޑިއުކޭޝަންގެ ސްޓޭޓް މިނިސްޓަރުކަންވެސް ކުރައްވާފައެވެ.
ސަލާމަތީ ދާއިރާގައި ގިނަ ތަޖުރިބާތަކެއް ހޯއްދަވާފައިވާ ފައިރޫޝް ވަނީ މީގެ ކުރިން މޯލްޑިވްސް ޕޮލިސް ސާވިސްގައި 20 އަހަރަށްވުރެ ގިނަ ދުވަހު ހިދުމަތް ކުރައްވާފައެވެ. ފުލުހުންގެ އިސް މަގާމުތަކެއް ފުރުއްވައި، އެސިސްޓަންޓް ކޮމިޝަނަރު އޮފް ޕޮލިސްގެ ރޭންކުގައި ހުންނަވައި އޭނާ ރިޓަޔަރ ކުރެއްވީ ޖެނުއަރީ 2021 ގައެވެ. އޮސްޓްރޭލިއާގެ މެކުއަރީ ޔުނިވަރސިޓީން ޕޮލިސިންގ، އިންޓެލިޖެންސް އަދި ކައުންޓަރ ޓެރަރިޒަމްގެ ދާއިރާއިން ޕީއެޗްޑީ ހާސިލުކުރައްވާފައިވާ ފައިރޫޝްއަކީ މި ދާއިރާތަކުން ދިރާސީ ކަރުދާސްތައްވެސް ޝާއިއުކުރައްވާފައިވާ ބޭފުޅެކެވެ.
ސްޓޭޓް މިނިސްޓަރުގެ މަގާމުގައި ހުންނެވި ދުވަސްވަރު، ޓެރަރިޒަމާ ދެކޮޅަށް ކުރެވޭ މަސައްކަތްތަކާއި، އިންސާނީ ވަގުފާފާ ހުއްޓުވުމާއި، ބައިނަލްއަގުވާމީ ކުށްތަކާ ދެކޮޅަށް ކުރެވޭ މަސައްކަތްތަކުގައި ރާއްޖެ ތަމްސީލުކުރެއްވުމުގައި އޭނާ އިސް ދައުރެއް އަދާކުރެއްވިއެވެ.
ފައިރޫޝް މަގާމުން އިސްތިއުފާ ދެއްވުމާ ގުޅޭގޮތުން މިނިސްޓްރީ އޮފް ހޯމްލޭންޑް ސެކިއުރިޓީން ނުވަތަ ރައީސުލްޖުމްހޫރިއްޔާގެ އޮފީހުން އަދި ރަސްމީކޮށް އެއްޗެއް ވިދާޅެއް ނުވެއެވެ. އަދި އޭނާ އިސްތިއުފާ ދެއްވި ސީދާ ސަބަބެއް ނުވަތަ ކުރިއަށް އޮތް ތަނުގައި ކުރައްވާނެ ކަމެއްވެސް ހާމަކުރައްވާފައެއް ނުވެއެވެ.
