މިހާތަނަށް ސަރުކާރުން ކުރި މަސައްކަތްތަކުން ގޭންގުހަދައިގެން ރަށުތެރޭގެ އަމަންނަގާލަމުން އައި އައުން ބޮޑުތަނުން ކޮންޓްރޯލްކުރެވިފައިވާ ކަމަށް ހޯމް މިނިސްޓަރު އަލީ އިހުސާން ވިދާޅުވެއްޖެއެވެ.
ދިވެހި ފުލުހުންގެ ހޮދުމަތުގެ 93 ވަނަ އަހަރީ ދުވަހުގެ މުނާސަބަތުގައި ސޯޝަލް ސެންޓަރުގައި ރޭ ބޭއްވި ޖަލްސާގައި ވާހަކަފުޅު ދައްކަވަމުން އިހުސާން ވިދާޅުވީ، މަސްތުވާތަކެތީގެ ވިޔަފާރިކުރާ ފަރާތްތައް ހުއްޓުވުމަށް ކުރާ މަސައްކަތުގެ ފުރިހަމަ ނަތީޖާ އަންނަ އަހަރު ހާސިލުވާނެ ކަމަށެވެ. އަދި އަންނަ އަހަރަކީ މިފަދަ ވިޔަފާރިކުރާ މީހުންނަށް ޓާގެޓްކޮށްގެން ފުލުހުން ކުރާ މަސައްކަތް އިތުރު "ގިއަރަކަށް" ބަދަލުކޮށް، ވަރުގަދަ ނަތީޖާއެއް ނެރޭނެ އަހަރެއް ކަމަށްވެސް މިނިސްޓަރު ފާހަގަކުރެއްވިއެވެ.
ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ބައިވެރިވެވަޑައިގެންނެވި މި ރަސްމިއްޔާތުގައި މިނިސްޓަރު ވިދާޅުވީ، ކުރިއަށް އޮތް އަހަރަކީ ކުށުގެ މާހައުލުގައި ހަރަކާތްތެރިވާ މީހުން އެ މާހައުލުން ދުރުކުރުމަށް ހާއްސަ މަސައްކަތްތަކެއް ކުރާނެ އަހަރެއް ކަމަށެވެ. މިއީ ރައީސުލްޖުމްހޫރިއްޔާގެ ތަރައްގީގެ ސިޔާސަތުގެ ތެރޭގައި ހިމެނޭ 'ސިކުންޑިއާއި ނަފްސު ތަރައްގީކުރުމުގެ ސިޔާސަތު'ގެ ދަށުން ކުރިއަށްގެންދާ މަސައްކަތެއްކަން ފާހަގަކުރައްވައި، މިނިސްޓަރު ވިދާޅުވީ އަމާޒަކީ ކުށުގެ ވެށީގައި ތިބޭ ކުދިން އަލުން އަނބުރާ މުޖުތަމައަށް އައިސް އަބުރުވެރި ދިރިއުޅުމެއް އުޅެވޭނެ މަގު ފަހިކޮށްދިނުން ކަމަށެވެ.
Advertisement
ފުލުހުންގެ ހިދުމަތަށް ޒަމާނީ ބަދަލުތައް ގެނައުމާ ގުޅޭގޮތުން ވާހަކަދައްކަވަމުން މިނިސްޓަރު އިހުސާން ވިދާޅުވީ، އަންނަ އަހަރު ފުލުހުންގެ އޮޕަރޭޝަންތަކުގައި "ޑްރޯން އެޒް ފަސްޓް ރެސްޕޮންޑާ" ގެ ހިދުމަތް ތައާރަފްކުރާނެ ކަމަށެވެ. މި ހިދުމަތުގެ ސަބަބުން ކުށެއް ރިޕޯޓްކުރުމާއެކު ޑްރޯން މެދުވެރިކޮށް އެ ސަރަހައްދެއްގެ ހާލަތު ވަގުތުން ބަލައި، ފުލުހުންނަށް އިތުރަށް ހަލުވިކަމާއެކު ހަރަކާތްތެރިވެވޭނެއެވެ. މީގެ އިތުރުން 911 ރެސްޕޮންސް ސެންޓަރުގެ ގާބިލުކަން އިތުރުކޮށް، އެހީއަށް އެދޭ ފަރާތުގެ ލޮކޭޝަން ވަގުތުން ދެނެގަނެވޭނެ ނިޒާމެއް ގާއިމްކުރެވޭނެ ކަމަށްވެސް ވިދާޅުވިއެވެ.
ސައިބަރ ކްރައިމް އަދި އޮންލައިން ފްރޯޑް ފަދަ ޓެކްނޮލޮޖީގެ އެހީގައި ހިންގާ ކުށްތަކަށް އަލިއަޅުވާލައްވަމުން މިނިސްޓަރު ވިދާޅުވީ، މިފަދަ ގޮންޖެހުންތަކާ ކުރިމަތިލުމަށް ފުލުހުންނަށް ބޭނުންވާ އެންމެ ޒަމާނީ ވަސީލަތްތައް ސަރުކާރުން ފޯރުކޮށްދޭނެ ކަމަށެވެ. އެގޮތުން ޓެކްނޮލޮޖީ ހޯސްޓްކުރުމަށް ޒަމާނީ ޑޭޓާ ސެންޓަރެއްގެ މަސައްކަތް މިހާރު ފެށިފައިވާކަން އެމަނިކުފާނު ހާމަކުރެއްވިއެވެ.
ފުލުހުންގެ އިންފްރާސްޓްރަކްޗާ ތަރައްގީކުރުމުގެ މަޝްރޫއާ ގުޅޭގޮތުން މިނިސްޓަރު ވިދާޅުވީ، މި ސަރުކާރު އައިއިރު ފުލުހުންގެ އަމިއްލަ މަރުކަޒު ހުރީ އެންމެ 17 ރަށުގައި ކަމަށާއި، ނަމަވެސް ފާއިތުވި އަހަރު އެކަނިވެސް 5 މަރުކަޒެއްގެ މަސައްކަތް ނިންމައި ހިދުމަތް ދޭން ފަށާފައިވާ ކަމަށެވެ. އަދި މި ދައުރު ނިމުމުގެ ކުރިން ފުލުހުން ގާއިމްވެތިބޭ ހުރިހާ ރަށެއްގައި އެކަށީގެންވާ ފެންވަރުގެ މަރުކަޒުތައް ހުންނާނެ ކަމުގެ ޔަގީންކަން ވަޒީރު ދެއްވިއެވެ.
މީގެ އިތުރުން، ގަވާއިދާ ހިލާފަށް އުޅޭ ބިދޭސީންގެ މައްސަލަ ހައްލުކުރުމަށް ކުރިއަށް އޮތް އަހަރު ހާއްސަ މަސައްކަތްތަކެއް ކުރެވޭނެ ކަމަށާއި، ބަޔޯމެޓްރިކްސް ނުދީ ފިލައިގެން އުޅޭ 2,000 އެއްހާ ބިދޭސީން ހޯދައި ޑީޕޯޓްކުރުމުގެ މަސައްކަތް ކުރިއަށްދާނެ ކަމަށްވެސް މިނިސްޓަރު އިހުސާން ވިދާޅުވިއެވެ.
