ޤައުމީ އެއަރލައިން، މޯލްޑިވިއަން އިން އަލަށް ގެނައި ވައިޑް-ބޮޑީ މަތިންދާބޯޓުގެ ދަތުރުތަކާއެކު ޗައިނާއިން އަހަރަކު 40،000 ފަތުރުވެރިން ރާއްޖެއަށް ގެނައުމަށް އަމާޒު ހިފައިފިއެވެ.
މޯލްޑިވިއަންގެ ޚިދުމަތަށް ފުރަތަމަ ފަހަރަށް ގެނައި ވައިޑް-ބޮޑީ މަތިންދާ ބޯޓަކީ 264 މީހުންގެ ޖާގައިގެ އެއަރބަސް އޭ330ގެ 200 ވޭރިއަންޓްގެ މަތިންދާބޯޓެކެވެ. މި ބޯޓު ރާއްޖެ ގެނެސްފައިވަނީ މިމަހުގެ 6 ވަނަ ދުވަހުއެވެ.
ދައުލަތުގެ މީޑިއާ ޕްރޮގްރާމެއްގައި ވާހަކަ ދައްކަވަމުން ފަތުރުވެރިކަމާ ބެހޭ ވަޒީރު ފައިޞަލް ވިދާޅުވީ، މޯލްޑިވިއަންގެ ޚިދުމަތައް ވައިޑް-ބޮޑީ މަތިންދާބޯޓު ގެނައުމަކީ ރާއްޖޭގެ ފަތުރުވެރިކަމަށް ލިބިގެންދިޔަ ވަރަށް ބޮޑު ކުރިއެރުމެއް ކަމަށެވެ. އަދި ކޮންމެ ޤައުމެއްގެވެސް ޤައުމީ އެއަރލައިން ވަރުގަދަވެގެން ދިއުމަކީ އެ ޤައުމަކަށް ލިބޭނެ ވަރަށް ބޮޑު ކުރިއެރުމެއް ކަމަށްވެސް ވަޒީރު ވިދާޅުވިއެވެ.
މޯލްޑިވިއަންގެ ވައިޑް-ބޮޑީ މަތިންދާބޯޓުގެ ފުރަތަމަ ދަތުރު ކުރުމަށް ހަމަޖެހިފައިވަނީ މިމަހުގެ 21ވަނަ ދުވަހު ޗައިނާގެ ޗެންޑޫއަށެވެ. ވަޒީރު ވިދާޅުވީ، މި ދަތުރުތަކާއެކު ޗައިނާއިން އަހަރެއްގެ މައްޗަށް 40،000 ފަތުރުވެރިން ރާއްޖެ ގެނެވޭނެކަމަށް ލަފާކުރެވޭކަމަށެވެ.
"މިހާރު މި ގެނެވުނު އެއަރކްރާފްޓްއިން 40،000 ފަތުރުވެރިން ޗައިނާއިން ގެނެވޭނެ. އެއީ ވަރަށް ބޮޑު ކުރިއެރުމެއް. މި ރިސްކު ނެގުން އެއީ މީގެ ކާމިޔާބީއަކީ." ވަޒީރު ވިދާޅުވިއެވެ.
މޯލްޑިވިއަނުން ވައިޑް ބޮޑީގެ ދަތުރުތައް ޗައިނާގެ ތިން ސިޓީއަކަށް ކުރުމަށް ވަނީ ހަމަޖެހިފައެވެ. އެއީ ބެއިޖިންގ، ޝެންހާއީ އަދި ޗެންޑޫއެވެ. މި ބޯޓުގައި ތިން ކެޓަގަރީގެ ފަސިންޖަރުންނަށް ޚިދުމަތްދެވޭނެއެވެ. އެއީ އިކޮނޮމީ ކްލާސް، ބިޒްނަސް ކްލާސްގެ އިތުރުން ޕްރިމިއަމް ކްލާސްއެވެ.
ޗައިނާއަކީ މިދިޔަ އަހަރު ރާއްޖެއަށް އެންމެ ގިނަ ޢަދަދަކަށް ފަތުރުވެރިން އައި ޤައުމެވެ. މިދިޔަ އަހަރު ޗައިނާއިން ރާއްޖެއަށް 2 ލައްކައަށްވުރެ ގިނަ ފަތުރުވެރިން ވަނީ ޒިޔާރަތްކޮށްފައެވެ.
