މިދިޔަ އަހަރު މާލެ ސިޓީ ޕޮލިހަށް ހުށަހެޅުނު އެކި މައްސަލަތަކުގައި ކޮށްފައިވާ މަސައްކަތްތަކުން 19.2 މިލިއަން ރުފިޔާގެ ތަކެތި ރިކަވާކޮށްދެވިފައިވާކަން ފުލުހުންގެ ތަފާސްހިސާބުތަކުން ދައްކައިފިއެވެ.

ފުލުހުން ވަނީ މާލެ ސިޓީ ޕޮލިހުގައި ހިމެނޭ މާލެ ފްރަންޓްލައިން ޕޮލިސިންގ، ތިލަމާލެ ޕޮލިސް އަދި ޓްރެފިކް ޕޮލިސް އެންޑް ރޯޑް މެނޭޖްމަންޓުގެ މިދިޔަ އަހަރުގެ ތަފާސްހިސާބުތައް މިއަދު އާންމުކޮށްފައެވެ.

އެ ތަފާސްހިސާބުތަކަށް ބަލާއިރު، މިދިޔަ އަހަރު ޖުމްލަ 1،653 އައިޓަމެއް ރިކަވާކޮށްފައިވާއިރު، އެ ތަކެތީގެ ޖުމްލަ އަގު 19.2 މިލިއަން ރުފިޔާ އަށް ވުރެ ގިނައެވެ.

ރިކަވާކޮށްފައިވާ ތަކެތީގެ ތެރޭގައި 206 މޯބައިލް ފޯނު (1.983،564.79ރ.)، 253 މޮޓޯ ސައިކަލް (11،489،400ރ.)، 107 އިލެކްޓްރޯނިކްސް އައިޓަމް (986،843.42ރ.) އާއި އިލެކްޓްރޯނިކް އެހެނިހެން ތަކެތީގެ 333 އައިޓަމް (551،206.62ރ.)، އާއި 374 މައްސަލައެއްގައި ހިމެނޭ 3،582،837.11ރ. ގެ ނަގުދު ފައިސާ އަދި އެހެނިހެން 380 އައިޓަމް (615،813.56ރ.) ހިމޭނެ ކަމަށް ފުލުހުން ބުންޏެވެ.

ފުލުހުން ބުނީ މިދިޔަ އަހަރު މާލޭ ސިޓީ ޕޮލިހަށް ވޮލިއުމް ކްރައިމްގެ ޖުމްލަ 5،242 މައްސަލަ ހުށަހަޅާފައިވާ ކަމަށެވެ. އޭގެ ތެރޭގައި ހިމެނެނީ ވައްކަމުގެ 2،290 މައްސަލަ، އެކްސިޑެންޓުގެ 2،025 މައްސަލަ، ފޭރުމުގެ 414 މައްސަލަ، މަސްތުވާތަކެތީގެ 236 މައްސަލަ އަދި މާރާމާރީގެ 358 މައްސަލައެވެ.

މާލޭ ސިޓީ ޕޮލިހުން މިދިޔަ އަހަރު ކޮށްފައިވާ ތަޙުޤީޤުތަކުގެ ތަފާސްހިސާބުތަކަށް ބަލާއިރު ޖުމްލަ 9،154 މައްސަލަ ތަޙުޤީޤުކޮށްފައިވެއެވެ. އޭގެ ތެރެއިން ކޭސްކޮށްގެން 7،157 މައްސަލައެއް ތަޙުޤީޤުކޮށްފައިވެއެވެ. އަދި 6،645 މައްސަލައެއް ފައިލްކުރި އިރު، 64 މައްސަލައެއް ޕީޖީ އޮފީހަށް ފޮނުވާފައިވެއެވެ.

ފުލުހުން ބުނީ އެ މައްސަލަތަކުގައި ޖުމްލަ 1،000 މީހުން ފުލުހުންގެ ބެލުމުގެ ދަށަށް ގެންދިޔައިރު، އޭގެ ތެރޭގައި ހައްޔަރުކޮށްފައިވަނީ 805 މީހަކު ކަމަށެވެ.