ސަރުކާރު ހިންގާ ޕާޓީ ޕީއެންސީއަށް މެންބަރުން އިތުރުކުރުމަށް ހިންގި ޕްރޮގްރާމްގެ ތެރެއިން ސައްޙަ ނޫން ފޯމުތަކެއް ހުށަހެޅިފައިވާ ކަން ފާހަގަކުރެވިފައިވާ ކަމަށާއި އެ މައްސަލަ ހިނގި ގޮތް ބަލާނެ ކަމަށް އެ ޕާޓީން މިއަދު ބުނެފިއެވެ.

ޕީއެންސީން މިއަދު ނެރުނު ނޫސްބަޔާނެއްގައި ބުނީ ޕާޓީގެ އެކްޓިވިސްޓުންނާއި ހެޔޮ އެދޭ ގިނަ ބަޔަކު ބައިވެރިވެގެން އެތައް ހާސް ފޯމެއް ހުށަހެޅިއިރު، މަދުން ނަމަވެސް ސައްޙަ ނޫން ފޯމުތަކެއް ހުށަހެޅިފައިވާކަން އެ ޕާޓީއަށް ފާހަގަކުރެވިފައިވާ ކަމަށެވެ.

ޕީއެންސީން ބުނީ ޕާޓީއަށް ވަނުމަށް އެދި ލިބުނު ފޯމުތަކުގެ ސައްޙަކަން ކަށަވަރުކުރުމުގެ ޤާބިލުކަން އެ ޕާޓީއަށް ލިބިފައިނުވާ ކަމަށެވެ. ފޯމުގެ ސައްޙަ ކަމާ މެދުގައި ސުވާލު އުފެދެނީ އިލެކްޝަންސް ކޮމިޝަނަށް ފޯމު ހުށަހެޅުމުގެ ފަހު މަރުޙަލާގައި ކަމަށާއި މިއީ ހަމައެކަނި އެ ޕާޓީއަށް އޮތް ގޮންޖެހުމެއް ނޫން ކަމަށް ވެސް ބުންޏެވެ.

ސައްޙަ ނޫން ފޯމުތަކެއް ހުށަހަޅާފައިވާ މައްސަލަ އިލެކްޝަންސް ކޮމިޝަނާއި ފުލުހުންގެ ޚިދުމަތަށް ހުށަހަޅާފައި ވާތީ އެ ތަޙުޤީޤަށް ޕާޓީގެ ފުރިހަމަ އެއްބާރުލުން ލިބޭނެ ކަމުގެ ޔަޤީންކަން ވެސް ޕީއެންސީން ދިނެވެ،

"މިހާތަނަށް އެކި ފަރާތްތަކުން، ސައްޙަ ނޫން ފޯމްތަކެއް މި ޕާޓީގެ ނަމުގައި އިލެކްޝަންސް ކޮމިޝަނަށް ހުށަހަޅާފައިވާ ކަމަށް ބަޔާންކޮށް އިލެކްޝަންސް ކޮމިޝަނާއި ދިވެހި ފުލުހުންގެ ޚިދުމަތަށް ލޮގް ކުރައްވާފައި ވާތީ، އެ ދެ މުއައްސަސާއިން ވެސް ވަނީ އެ މައްސަލަތައް ބައްލަވަމުން ގެންދަވާކަން މި ޕާޓީއަށް އަންގާފައެވެ." ޕީއެންސީގެ ބަޔާނުގައި ބުންޏެވެ.

އެހެންވެ ޕާޓީން ވެސް މިކަން ހިނގާފައިވާ ގޮތް ބަލަމުން އަންނަ ކަމަށް ބުންޏެވެ.

ޕީއެންސީން ބުނީ މި ކަހަލަ ކަންކަމަކީ އެ ޕާޓީން ތާއީދުކޮށް، ހިތްވަރު ދޭ ކަންކަން ނޫން ކަމަށާއި ދިމާވެފައިވާ މައްސަލައަށް އަވަސް ޙައްލެއް ގެނައުމަށް، ނޭނގި އެ ޕާޓީއަށް ވައްދާފައިވާ ނަމަ ޕާޓީއަށް މެއިލް ކުރުމަށް އެދޭ ކަމަށެވެ.