މޫސުމާ ބެހޭ ޤައުމީ އިދާރާއިން ވިއްސާރަވާނެ ކަމަށް ލަފާކޮށް ނެރުނު ބަޔާނާ ގުޅިގެން، ފެނަކަ ކޯޕަރޭޝަން ލިމިޓެޑްގެ އިމަޖެންސީ ރެސްޕޮންސިވް ޓީމްތައް ރަށްރަށުގައި ހަރަކާތްތެރިވަމުންދާ ކަމަށް އެ ކުންފުނިން ބުނެފިއެވެ.

ފެނަކައިން ބުނީ، ވިއްސާރައާ ގުޅިގެން ދިމާވެދާނެ ކަންކަމަށް ދުރާލާ ތައްޔާރުވުމުގެ ގޮތުން، ފެނަކައިގެ ބްރާންޗްތަކުގައި އެކުލަވާލާފައިވާ ކުއްލި ޙާލަތްތަކަށް އިޖާބަދޭ ޓީމްތައް، ރަށްރަށުގައި ހަރަކާތްތެރިވާ އެހެނިހެން މުއައްސަސާތަކާ ގުޅިގެން މަސައްކަތްކުރުމަށް ތައްޔާރީ ޙާލަތުގައި ތިބި ކަމަށެވެ.

ފެނަކައިން ޚިދުމަތް ފޯރުކޮށްދޭ 151 ރަށުގައި މިފަދަ ކުއްލި ޙާލަތަށް އިޖާބަދޭ ޓީމްތައް އެކުލަވާލާފައިވާ ކަމަށާއި، މި ޓީމްތަކުގައި ޖުމްލަ 2,311 މުވައްޒަފުން ހަރަކާތްތެރިވާނެ ކަމަށްވެސް އެ ކުންފުނިން ބުންޏެވެ.

"މިފަދަ ކޮންމެ ޙާލަތެއްގައިވެސް ރައްޔިތުންނާއެކު ދެމިތިބޭނެ ކަމުގެ ޔަޤީންކަން އަރުވަމެވެ. ރައްޔިތުންގެ ސަލާމަތާއި ރައްކާތެރިކަމަށް އިސްކަންދީ، ކުއްލި ޙާލަތުގައި އެހީތެރިކަން ފޯރުކޮށްދިނުމަކީ ފެނަކައިން އަބަދުވެސް އިސްކަންދޭނެ ކަމެކެވެ." ފެނަކައިން ބުނެފައިވެއެވެ.

މޫސުމާ ބެހޭ ޤައުމީ އިދާރާއިން ނެރުނު އިންޒާރާ ގުޅިގެން، ސަރުކާރުގެ އެހެން މުއައްސަސާތަކުންވެސް ވަނީ ރައްކާތެރިކަމުގެ ފިޔަވަޅުތައް އިތުރުކޮށް، ކުއްލި ޙާލަތަށް ތައްޔާރުވެފައިވާ ކަމަށް ބުނެފައެވެ. މިގޮތުން މޯލްޑިވްސް ޕޮލިސް ސަރވިސްއާއި މޯލްޑިވްސް ނޭޝަނަލް ޑިފެންސް ފޯސްގެ އިތުރުން ސިވިލް ޑިފެންސް އޮތޯރިޓީންވެސް އަންނަނީ ރައްކާތެރިކަމުގެ ފިޔަވަޅުތައް އެޅުމުގައި ހަރަކާތްތެރިވަމުންނެވެ.