އިސްލާމްދީނުގައި އިލްމު އުނގަންނައިދީފައިވަނީ ހަމައެކަނި ފިރިހެނުންނަށް ނޫންކަމަށާއި އަންހެނުންވެސް އިލްމުވެރި ބަޔަކަށް ހެދީ އިސްލާމްދީންކަމަށް އިސްލާމީ ކަންތައްތަކާބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދު ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ މުސްލިމް ވޯލްޑް ލީގް (ރާބިޠަތުލް ޢާލަމިލްއިސްލާމީ)ގެ ދަޢުވަތަކަށް، އިސްލާމީ މުޖުތަމަޢުތަކުގައި އަންހެންދަރީންނަށް ތަޢުލީމުދިނުމާއި ބެހޭގޮތުން ޕާކިސްތާނުގައި ބޭއްވުނު ބައިނަލްއަޤްވާމީ ކޮންފަރެންސްގެ އިލްމުވެރިންގެ ސެޝަންގައި ތަޤުރީރު ކުރައްވަމުންނެވެ.

ތަޤުރީރުގައި ޑރ. ޝަހީމް ވިދާޅުވީ އިސްލާމްދީނަކީ އިލްމުގެ ދީންކަމާއި އިންސާނީ ޙަޔާތުގެ އަސާސަކީ އިލްމުކަމެވެ. އަދި ކީރިތި ރަސޫލާގެ އަނބިކަނބަލުން ޢާއިޝަތުގެފާނަކީ އިލްމުވެރިކަމުގެ ނަމޫނާއެއް ކަމަށާއި، ރަސޫލާގެ ޙަޔާތްޕުޅުގައި އަންހެނުންނަށް އިލްމު ދެއްވުމަށް ވަކި ވަގުތެއް ޚާއްޞަ ކުރެއްވިކަން ސާބިތުވާ ކަމަށް ވެސް ފާހަގަކުރެއްވިއެވެ.

ވަޒީރުގެ ތަޤުރީރުގައި އިލްމު ފެތުރުމަށް ރާބިޠާއިންނާއި ސަޢޫދީ ޢަރަބިއްޔާގެ ސަރުކާރުން ކުރައްވާ މަސައްކަތްތަކަށް ޝުކުރު އަދާކުރައްވައި، ޕާކިސްތާނާއި އިސްލާމީ އެންމެހައި ޤައުމުތަކުން އިލްމު ފެތުރުމަށް ކުރައްވާ މަސައްކަތްތައް ވެސް ފާހަގަ ކުރެއްވިއެވެ.

އިސްލާމީ ކަންތައްތަކާބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދަކީ މުސްލިމް ވޯލްޑް ލީގްގެ ސުޕްރީމް ކައުންސިލްގެ މެންބަރެކެވެ.