ހުޅުމާލޭ ދެވަނަ ފޭސްގައި އިމާރާތްކޮށްފައިވާ ހިޔާ ފްލެޓުތަކުގެ ފެނުގެ ޚިދުމަތް މެދުކެނޑުނު މައްސަލަ ވީހާ ވެސް އަވަހަށް ހައްލުކުރުމަށް އެމްޑަބުލިޔުއެސްސީން މަސައްކަތް ފަށައިފިއެވެ.

އެމްޑަބްލިއުއެސްސީން ބުނިގޮތުގައި ހިޔާ ފްލެޓްތަކުގެ 1 ނަންބަރު ޓަވަރުން ފެށިގެން 8 ވަނަ ޓަވަރާއި ހަމައަށް ހުރިހާ ފަންގިފިލާތަކުން ފެނުގެ ޚިދުމަތް މެދުކެނޑިފައިވަނީ ހޮޅިއެއް ފަޅައިގެން ދިއުމުގެ ސަބަބުންނެވެ. މި މައްސަލަ ހައްލުކުރުމަށް އެމްޑަބްލިއުއެސްސީގެ ޓީމުތަކުން ދަނީ މަސައްކަތް ކުރަމުންނެވެ.

"މި މައްސަލަ އަވަސް ގޮތެއްގައި ހައްލު ކުރުމުގެ މަސައްކަތް އެމްޑަބްލިއުއެސްސީގެ ޓީމުން ދަނީ ކުރަމުންނެވެ. އަދި މިކަމުގެ ސަބަބުން ކަސްޓަމަރުންނަށް ދިމާވާނެ ދަތިތަކަށް ކުންފުނީގެ ފަރާތުން ނިހާޔަތަށް މާފަށް އެދެމެވެ،" އެމްޑަބްލިއުއެސްސީން އެކްސްގައި ބުންޏެވެ.

އެޗްޑީސީން ވެސް މިއަދު ހަވީރު ބުނެފައިވަނީ ފެނުގެ ޚިދުމަތް މެދުކެނޑުނީ ދިމާވި ކުއްލި މައްސަލައަކާ ގުޅިގެން ކަމަށާއި، އެ މައްސަލަ ވީ އެންމެ އަވަހަކަށް ހައްލުކުރުމަށް އެމްޑަބްލިއުއެސްސީއާއެކު މަސައްކަތް ކުރަމުންދާ ކަމަށެވެ.