ތަރައްޤީގެ ނަފާ ރައްޔިތުންނަށް ލިބޭނީ ހަމަޖެހުން އޮވެގެންކަމަށާއި، އެހެންކަމުން ހަމަޖެހުން ނަގާލުމުގެ ފުރުސަތު އެއްވެސް ބަޔަކަށް ނުދެއްވާނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

ރައީސުލްޖުމްހޫރިއްޔާ މިހެން ވިދާޅުވީ މިހާރު ހުވަދުއަތޮޅަށް ކުރައްވަމުން ގެންދަވާ ދަތުރުފުޅުގެ ތެރެއިން ގއ. މާމެންދޫ ރައްޔިތުންނާއި ބައްދަލުކުރައްވައި ދެއްކެވި ވާހަކަފުޅުގައެވެ.

މާމެންދޫ އަށްފަހު ދެން ރައީސް ވަޑައިގަންނަވާނީ އެ އަތޮޅު ދެއްވަދޫ އަށެވެ.

ރައީސުލްޖުމްހޫރިއްޔާ ވިދާޅުވީ، ޙަގީގީ މާނައިގައި ތަރައްޤީ ގެނައުމަށްޓަކައި ޤައުމުގެ ހަމަޖެހުން ޤާއިމުވެފައި އޮތުމަކީ މުހިއްމުކަމެއް ކަމަށެވެ. އެހެންކަމުން ޤައުމުގެ ހަމަޖެހުން ނަގާލުމުގެ ފުރުސަތު އެއްވެސް ބަޔަކަށް ނުދެއްވާނެ ކަމަށާއި އެފަދަ ކަމެއް ކުރާނަމަ ޤައުމީ ވިސްނުމެއްގައި އެކަމެއް ހުއްޓުވާނެ ކަމަށް ރައީސުލްޖުމްހޫރިއްޔާ ވިދާޅުވިއެވެ.

"މިޤައުމުގައި ސިޔާސީ ފަރާތްތަކުން އަދި އެނޫންވެސް ބަޔަކަށް މިހަމަޖެހުން ނަގާލުމަކަށް އަޅުގަނޑެއް ޖާގައެއް ނުދޭނަން. އެއްވެސް ފުރުސަތެއް އެކަމަކަށް ނުދޭނަން. އެކަމަށް އެއްވެސް ބަޔަކު އެއްވެސް ކަމެއް ކުރަން މަސައްކަތްކޮށްފިނަމަ އަޅުގަނޑު އެކަން ޤައުމީ ވިސްނުމެއްގައި ހުއްޓުވައި ޤައުމުގެ ހަމަޖެހުން ޔަގީންކުރާނަން" ރައީސް ވިދާޅުވިއެވެ.

ރައީސުލްޖުމްހޫރިއްޔާ ވިދާޅުވީ ވޭތުވެދިޔަ 14 މަސްދުވަހުވެސް އެމަނިކުފާނު އެންމެ އިސްކަމެއް ދެއްވި އެއްކަމަކީ، ޤައުމުގެ ހަމަޖެހުން ޤާއިމުކުރުމަށްކަމަށެވެ. އަދި ސިޔާސީ ވާދަވެރިން ހިފައި ހައްޔަރުކޮށް، އަނިޔާ ދިނުމަށް އެއްވެސް މަސައްކަތެއް ކުރައްވާފައި ނުވާނެކަމަށާއި، އަދި ކުރިއަށް އޮތްތަނުގައި ވެސް އެފަދަ ކަމެއް ނުކުރައްވާނެ ކަމަށް ރައީސުލްޖުމްހޫރިއްޔާ ވިދާޅުވިއެވެ.

މީގެއިތުރުން، ރައީސުލްޖުމްހޫރިއްޔާ ވިދާޅުވީ ބޯހިޔަވަހިކަމުގެ މައްސަލަ ޙައްލުކުރުމަށް މިއަހަރުގެ ތެރޭގައި ބަޖެޓުގެ ތެރެއިންނާއި ބޭންކުތައް މެދުވެރިކޮށް ގިނަ މަސައްކަތްތަކެއް ފެށިގެންދާނެ ކަމަށެވެ. އަދި ރައްޔިތުން އެދޭފަދަ ބޯހިޔަވަހިކަމެއް ހޯދުމަށް ސަރުކާރުން ހުޅުވާލާފައިވާ ސްކީމްތަކުގެ ބޭނުންކޮށް މި 5 އަހަރު ނިމިގެންދާއިރު ކޮންމެ ދިވެއްސަކަށް ވެސް އެމީހެއްގެ ފުރަތަމަ ގެދޮރު ލިބިފައި ހުރުމަށް އެދިވަޑައިގަންނަވާކަން ވިދާޅުވިއެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އަދި ވިދާޅުވީ ހަގީގީ މާނައިގައި ތަރައްޤީ ކަށަވަރުކުރެވޭނީ ޤައުމުގެ ހަމަޖެހުން ޔަގީންކުރެވިގެން ކަމަށާއި އެކަން ޔަގީންކުރުމަށް ރައްޔިތުންގެ ފުރިހަމަ އެއްބާރުލުން ބޭނުންވާކަމަށެވެ.

މި ބައްދަލުވުމުގައި ރައްޔިތުންގެ ކަންބޮޑުވުންތަކަށް ރައީސުލްޖުމްހޫރިއްޔާ އަޑުއެއްސެވިއެވެ. އަދި އެ ކަންބޮޑުވުންތަކަށް ޙައްލު ހޯދައިދެއްވުމަށް މަސައްކަތް ކުރައްވާނެ ކަމުގެ ޔަގީންކަން ރައްޔިތުންނަށް ދެއްވިއެވެ.

ރައީސުލްޖުމްހޫރިއްޔާގެ މި ދަތުރުފުޅަކީ ހުވަދުއަތޮޅުގެ ރަށްތަކުގެ ތަރައްޤީގެ މަޝްރޫޢުތައް ބައްލަވާލެއްވުމަށާއި، ރައްޔިތުންނާއި ބައްދަލުކުރެއްވުމަށް ކުރައްވާ ދަތުރުފުޅެކެވެ. މި ދަތުރުފުޅުގައި ރައީސުލްޖުމްހޫރިއްޔާއާއެކު ސަރުކާރުގެ އިސް ވެރިން ބައިވެރިވެވަޑައިގެންފައި ވެއެވެ.