ގއ. މާމެންދޫއަށް ދިމާވެފައިވާ ރަށްގިރުމުގެ މައްސަލައާއި، ހުއްޓިފައިވާ ނަރުދަމާ އެޅުމުގެ މަޝްރޫޢު އަދި މަގުތައް ހެދުމަށް އިސްކަންދެއްވާނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ވިދާޅުވެއްޖެއެވެ.
މާމެންދޫގެ ރައްޔިތުންނާއި ބައްދަލުކުރެއްވުމަށް ބޭއްވި ޖަލްސާގައި ވާހަކަފުޅު ދައްކަވަމުން ރައީސް ވިދާޅުވީ ރަށުގައި ފަށާފައިވާ ނުނިމި ހުރި މަޝްރޫޢުތައް އަވަސް މުއްދަތެއްގައި ނިންމުމަށް މަގުފަހިކޮށްދެއްވާނެ ކަމަށެވެ. އަދި ރަށަށް ދިމާވެފައިވާ ރަށްގިރުމުގެ މައްސަލައާއި ރަށުގެ މަގުތައް ހެދުމަށް އިސްކަންދެއްވާނެ ކަމަށްވެސް ވިދާޅުވިއެވެ.
ރައީސް މުއިއްޒު ވިދާޅުވީ، "މި މަޝްރޫޢު (ނަރުދަމާ އެޅުމުގެ މަޝްރޫޢު) ނުނިމި ދިގުލައިގެން ގޮސްފައިވާ މައްސަލަ އެއްކޮށް ހައްލުކޮށްދީ، އެ މަސައްކަތް ކުރެވޭނެ ގޮތް އަޅުގަނޑު ހަމަޖައްސައިދީ ލަސްތަކެއް ނުވެ އަލުން ފަށައިދީ ބާރު ސްޕީޑުގައި ގެންގޮސް ނިންމައިދޭނަން. އެ ޔަގީންކަން އަރުވަން. އެ މަސައްކަތް ނިމޭ ހިސާބުން މަގު ހެދުމުގެ މަސައްކަތް ފަށައިދޭނަން. އެއީވެސް ސޮއިކޮށްފައި އޮތް މަޝްރޫޢެއް. އެ ޔަގީންކަން ވެސް އަރުވަން."
މާމެންދޫގެ ރަށްގިރުމުގެ މައްސަލައަކީ "އިންތިހާއަށް ބޮޑުވެފައިވާ މައްސަލައެއް" ކަމަށް ފާހަގަކުރައްވައި، ރައީސް މުއިއްޒު ވިދާޅުވީ އެ މައްސަލައަށް އެ ރަށު ކައުންސިލާއި ގުޅިގެން ކޮންސްޓްރަކްޝަން މިނިސްޓްރީގެ އެހީތެރިކަމާއެކު ހައްލު ގެނެސްދެއްވާނެ ކަމަށެވެ.
މީގެ އިތުރުން، ދާއިމީ ހައްލެއް ލިބެންދެން ކައުންސިލްގެ ބެލުމުގެ ދަށުން ހުރި ބޮޑެތި ހިލަ ބޭނުންކޮށްގެން ވަގުތީ ހައްލެއް ގެނެސްދިނުމަށް މަސައްކަތް ފައްޓަވާނެ ކަމަށް ވެސް ރައީސް ވިދާޅުވިއެވެ.
