ރައީސުލްޖުމްހޫރިއްޔާ މިހާރު ހުވަދޫ އަތޮޅަށް ކުރައްވަމުން ގެންދަވާ ދަތުރުފުޅުގެ ތެރެއިން ދެންމެ އެއަތޮޅު މާމެންދޫ އަށް ވަޑައިގެންނެވުމުން އެރަށު ރައްޔިތުން އެމަނިކުފާނަށް ވަރަށް ހޫނު މަރުޙަބާއެއް ދަންނަވައިފިއެވެ.
މާމެންދޫއަކީ އިސްލާމިކް މިނިސްޓަރ ޑރ. މުޙައްމަދު ޝަހީމް ޢަލީ ސަޢީދު އާއި ކުރީގެ އިމިގްރޭޝަން ކޮންޓްރޯލާ ހަސަން ޢަލީގެ އިތުރުން ހޯމް މިނިސްޓްރީގެ އަޝްރަފް ޢަލީ (މަޝްހޫތު ޅެންވެރިޔާ) ވެސް ނިސްބަތްވާ ރަށެވެ.
ރައީސް މާމެންދޫއަށް ވަޑައިަގަތުމުން އެ ރަށުގެ ކުދި ބޮޑު އެންމެން ވަނީ އެމަނިކުފާނަށް ރަތް ދޫލައިގެ މަރުޙަބާއެއް ކިޔައިފައިއެވެ.
Advertisement
މިއަދު އެންމެ ފުރަތަމަ ރަތަފަންދޫއަށް ވަޑައިގެންފައިވާއިރު އެރަަށްފަހު ރައީސް ވަނީ އިތުރު 2 ރަށަކަށް ވަޑައިގެންފައެވެ. އެއީ ކަނޑުހުޅުދޫ އަދި ނިލަންދޫއެވެ.
މި ދަތުރުފުޅުގައި ރައީސް ވަނީ މީގެ ކުރިން ހުވަދޫ އަތޮޅު ދެކުނުބުރީގެ ފަސް ރަށަކަށް ވަޑައިގެންފައެވެ. އެއީ ހޯނޑެއްދޫ، ނަޑެއްލާ، ވާދޫ އަދި ފިޔޯރީގެ އިތުރުން ރަތަފަންދޫއެވެ.
އެ ރަށްރަށުގެ ރައްޔިތުންނާއި ބައްދަލުކުރައްވައި، ރައްޔިތުންނަށް ވެވަޑައިގެންފައިވާ ވައުދުތައް ފުއްދަވާނެ ކަމުގެ ޔަޤީންކަން އެމަނިކުފާނު ވަނީ ދެއްވާފައެވެ. އަދި އެ ރަށްރަށުގެ ރައްޔިތުން ބޭނުންވާ ކަންތައްތައް ވެސް އޮޅުން ފިލުއްވައި، އެކަންކަމަށް ޙައްލު ގެނެސްދިނުމަށް ސަރުކާރުން މަސައްކަތް ކުރާނެ ކަމުގެ ފުރިހަމަ ޔަޤީންކަން ވެސް އެމަނިކުފާނު ވަނީ ދެއްވާފައެވެ.
ރައީސްގެ މިފަހަރުގެ އެންމެ ފަހު ރަށެއްގެ ގޮތުން މާދަމާ ވަޑައިގަންނަވާނީ ދެއްވަދޫއަށެވެ.
މި ދަތުރުފުޅުގައި ރައީސްގެ އަރިހުގައި ސަރުކާރުގެ އިސް ބޭފުޅުންވެސް ބައިވެރިވެވަޑައިގަންނަވައެވެ.
