ދިވެހިރާއްޖޭގެ ދިފާޢީ ވަޒީރު މުޙައްމަދު ޣައްސާން މައުމޫން މިމަހުގެ 7 އިން 8 އަށް އިންޑިޔާއަށް ކުރައްވަމުން ގެންދަވާ ރަސްމީ ދަތުރުފުޅުގައި، އިންޑިޔާގެ ދިފާޢީ ވަޒީރު ރާޖްނާތު ސިންގްއާ ބައްދަލުކުރައްވައި ދެ ޤައުމުގެ ދިފާޢީ ގުޅުން ވަރުގަދަކުރުމާ ގުޅޭގޮތުން މަޝްވަރާކުރައްވައިފިއެވެ.
މި ބައްދަލުވުމުގައި ދިފާޢީ ވަޒީރު މުޙައްމަދު ޣައްސާން މައުމޫން ވަނީ އިންޑިޔާ ސަރުކާރުން ދިވެހިރާއްޖޭގެ ޤައުމީ ދިފާޢީ ބާރަށް ވެދެއްވާ އެހީތެރިކަމަށް ޝުކުރު އަދާކުރައްވާފައެވެ. އޭގެތެރޭގައި 1988 ގައި ވެދެއްވި އެހީތެރިކަމާއި، ޒަމާނީ އަސްކަރިއްޔާ އަކަށް ޤައުމީ ދިފާޢީ ބާރު ހެދުމަށް އިންޑިޔާއިން ފޯރުކޮށްދޭ އެހީތެރިކަން ހިމެނެއެވެ.
އިންޑިޔާގެ ދިފާޢީ ވަޒީރު ރާޖްނާތު ސިންގް ވިދާޅުވީ، އިންޑިޔާއިން ރާއްޖޭގެ ދިފާޢީ ދާއިރާ ހަރުދަނާ ކުރުމަށް ހުރިހާ ގޮތަކުންވެސް އެހީތެރިކަން ފޯރުކޮށްދެމުންދާ ކަމަށެވެ. އަދި ކުރިމަގުގައިވެސް މި ގުޅުން އިތުރަށް ބަދަހިކޮށް، އަސްކަރީ ތަމްރީނުތަކާއި ޤާބިލިއްޔަތުކަން އިތުރުކުރުމަށް ވަސީލަތްތައް ފޯރުކޮށްދޭނެ ކަމަށްވެސް އެ މަނިކުފާނު ވިދާޅުވިއެވެ.
މި ދަތުރުފުޅުގައި ރާއްޖޭގެ ޤައުމީ ދިފާޢީ ބާރުގެ އިސްފަރާތްތައް ބައިވެރިވެވަޑައިގަންނަވައެވެ.
މިއީ ދިފާޢީ ވަޒީރު މުޙައްމަދު ޣައްސާން މައުމޫން މަޤާމާއި ހަވާލުވުމަށްފަހު އިންޑިޔާއަށް ކުރައްވާ ފުރަތަމަ ރަސްމީ ދަތުރުފުޅެވެ
