އިންޑިއާ ސަރުކާރުން ދިވެހިރާއްޖެއަށް ފޯރުކޮށްދޭ ހިމަބިއްސާއި ރުބެއްލާ (އެމް.އާރް) ވެކްސިންގެ ދެވަނަ ޝިޕްމަންޓާއި، ތިން ޓަނުގެ ސިއްހީ ސާމާނު މާލެ ގެނެސްފިއެވެ. މި ތަކެއްޗަކީ މި މަހުގެ ތެރޭގައި އިންޑިއާ ސަރުކާރުން ރާއްޖޭގެ ސިއްހަތާއި އާއިލާއާއި އިޖުތިމާއީ އެހީއާ ބެހޭ ވުޒާރާއަށް ހަދިޔާކުރި ތަކެއްޗެވެ.

މި އެހީގެ ދަށުން ރާއްޖެއަށް ވަނީ 20،000 ޑޯޒްގެ އެމް.އާރް ވެކްސިނާއި، ގާތްގަނޑަކަށް 3 ޓަނުގެ ސިއްހީ ސާމާނު ފޮނުވާފައެވެ. މީގެ ތެރޭގައި ބަލި ދެނެގަތުމަށް ބޭނުންކުރާ ޑައިގްނޯސްޓިކް ކިޓުތަކާއި، ސިއްހީ ފަރުވާގެ އެކި ކަންކަމުގައި ބޭނުންކުރާނެ މުހިންމު ސާމާނުތައް ހިމެނެއެވެ.

https://x.com/HCIMaldives/status/2065436527388393681

ރާއްޖޭގައި ހުންނަ އިންޑިއާގެ ހައިކޮމިޝަނުން މިއަދު "އެކްސް" ގައި ކުރެއްވި ޕޯސްޓެއްގައި ވިދާޅުވީ، މިއީ ދިވެހިރާއްޖެއާއި އިންޑިއާއާ ދެމެދު އޮތް ޒަމާންވީ ވަރުގަދަ ގުޅުމާއި، އާންމު ސިއްހަތު ކުރިއެރުވުމަށް ދެ ގައުމުން ދޭ އަހައްމިއްޔަތު ހާމަކޮށްދޭ ކަމެއް ކަމަށެވެ. އަދި އިންޑިއާއިން އަބަދުވެސް އިސްކަން ދެނީ އަވަށްޓެރި ގައުމަކަށް ކަމެއް ދިމާވާ ހިނދު، އެންމެ ފުރަތަމަ އެހީތެރިކަން ފޯރުކޮށްދޭ ގައުމެއްގެ ގޮތުގައި ދެމިއޮތުމަށް ކަމަށްވެސް ހައިކޮމިޝަނުން ފާހަގަކުރެއްވިއެވެ.

ދިވެހިރާއްޖެއަށް ދިމާވާ އެކި ދަތި އުނދަގޫ ހާލަތްތަކުގައާއި ބޭނުންޖެހޭ ކަންކަމުގައި އިންޑިއާ ސަރުކާރުގެ ފަރާތުން އަބަދުވެސް ދީލަތީ އެހީތެރިކަން ލިބެމުންދާތީ، އެކަން ފާހަގަކޮށް ދިވެހި ސަރުކާރުގެ ފަރާތުން ވަނީ އިންޑިއާ ސަރުކާރަށް ޝުކުރު އަދާކޮށްފައެވެ. މި އެހީއަކީ ރާއްޖޭގެ ސިއްހީ ނިޒާމު ހަރުދަނާކުރުމަށާއި، ގައިންގަޔަށް އަރާ ބަލިތަކުން ރައްކާތެރިވުމަށް ކުރެވޭ މަސައްކަތަށް ލިބުނު ބޮޑު ކުރިއެރުމެކެވެ.