އިންޑިއާގެ ބޮޑުވަޒީރުކަމުގެ މަގާމުގައި މެދުނުކެނޑި އެންމެ ގިނަ ދުވަހު ހުންނެވި ބޭފުޅާގެ ތާރީޚީ ޝަރަފު، ބޮޑުވަޒީރު ނަރެންދުރަ މޯދީ ހޯއްދެވުމާ ގުޅިގެން، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އެމަނިކުފާނަށް ތަހުނިޔާ ފޮނުއްވައިފިއެވެ.

ރައީސުލްޖުމްހޫރިއްޔާގެ ރަސްމީ އެކްސް އެކައުންޓުން ކުރެއްވި ޕޯސްޓެއްގައި، ބޮޑުވަޒީރު މޯދީ ހޯއްދެވި މި ކާމިޔާބީއަށްޓަކައި ހޫނު މަރުހަބާއެއް ވަނީ ދަންނަވާފައެވެ. މި މެސެޖުގައި ރައީސުލްޖުމްހޫރިއްޔާ ވަނީ، ދިވެހިރާއްޖެއާއި އިންޑިއާއާ ދެމެދު އޮތް ގުޅުން އިތުރަށް ހަރުދަނާކުރުމަށް ރާއްޖެއިން އަބަދުވެސް މަސައްކަތް ކުރާނެ ކަމުގެ ޔަގީންކަން ދެއްވާފައެވެ. އަދި މި ގުޅުން ބިނާވެފައިވަނީ ދެގައުމުގެ މެދުގައި އޮތް އިހުތިރާމާއި، އިސްތިގުލާލީ ހަމަހަމަކަމާއި، ދެގައުމުގެ މަސްލަހަތު ހިމެނޭ ކަންކަމުގެ މައްޗަށް ކަން އެމަނިކުފާނު ފާހަގަކުރެއްވިއެވެ.

2014 ވަނަ އަހަރު ފުރަތަމަ ފަހަރަށް އިންތިޚާބުވެވަޑައިގަތް ބޮޑުވަޒީރު މޯދީ، މިހާރު ވަނީ ބޮޑުވަޒީރުކަމުގެ މަގާމުގައި މެދުނުކެނޑި 4,399 ދުވަސް ހޭދަކުރައްވައި، އިންޑިއާގެ ފުރަތަމަ ބޮޑުވަޒީރު ޖަވާހަރްލާލް ނެހުރޫ ހެއްދެވި ރެކޯޑު މުގުރާލައްވާފައެވެ.

މީގެ ކުރިން މި ރެކޯޑު އޮތް ޖަވާހަރްލާލް ނެހުރޫ، 1952 ވަނަ އަހަރު ބޭއްވި ފުރަތަމަ އިންތިޚާބަށްފަހު، މެދުނުކެނޑި ބޮޑުވަޒީރުކަމުގައި ހޭދަކުރެއްވީ 4,398 ދުވަހެވެ. އޭގެ ކުރިން 1947 އިން 1952 އަށް ނެހުރޫ ހުންނެވީ އިންތިގާލީ ސަރުކާރުގެ އިސްވެރިޔާގެ ގޮތުގައެވެ.

އިންޑިއާގެ ކުރީގެ ބޮޑުވަޒީރު އިންދިރާ ގާންދީ ވެސް ވަނީ 14 އަހަރު ވަންދެން ބޮޑުވަޒީރުކަން ކުރައްވާފައެވެ. ނަމަވެސް، އެކަމަނާގެ ދައުރުތަކަކީ މެދުކެނޑުންތަކެއް އައިސްފައިވާ ދައުރުތަކެކެވެ. އެގޮތުން 1977 ވަނަ އަހަރުގެ އާންމު އިންތިޚާބުން އެކަމަނާ ވަނީ ނާކާމިޔާބީއާ ކުރިމަތިލައްވަން ޖެހިވަޑައިގެންފައެވެ.