ޔުނައިޓެޑުން ރަޝްފޯޑް ބޭރުކުރުމަށް އޭނާގެ ބޭބެ މިލާނުގައި

މެންޗެސްޓަރ ޔުނައިޓެޑް ކުޅުންތެރިޔާ މާކަސް ރްޝްފޯޑްގެ ބޭބެ ޑޭން ރަޝްފޯޑް މިހާރު ހުރީ އިޓަލީގެ މިލާން ސިޓީގައިކަމަށް ރިޕޯޓުތަކުން ބުނެއެވެ. މިއީ ރަޝްފޯޑް މެންޗެސްޓަރ ޔުނައިޓެޑުން ބޭރުވެ، އޭސީ މިލާނަށް ބަދަލުވުމުގެ މަޝްވަރާތަކެއް ކުރިއަށްދާ ދަނޑިވަޅެކެވެ. .

ޓްރާންސްފަރ މާހިރު މެޓިއޯ މޮރެޓޯ ބުނާ ގޮތުގައި ޑޭން ރަޝްފޯޑް މިދިޔަ ހަފްތާގައި މިލާން ސިޓީގައި ހުރިކަން ކަށަވަރުވެއެވެ. ޑޭންއަކީ ޑީއެން މޭ ސްޕޯޓްސް މެނޭޖްމަންޓްގެ ޑިރެކްޓަރެކެވެ. މި ކުންފުނިން މާކަސް ރަޝްފޯޑްގެ އޭޖެންޓްކަން ބަލަހައްޓައެވެ.

މިދިޔަ ހަފްތާގައި ރަޝްފޯޑް މިލާނަށް ބަދަލުވެދާނެކަމުގެ ވާހަކަތައް ދެކެވެމުން ދިޔައެވެ. އަދި އަންގާރަ ދުވަހު ނެރުނު ރިޕޯޓުތަކުގައި ބުނެފައިވަނީ ޖަރުމަނުގެ ބޮރޫޝިއާ ޑޯޓްމަންޑުންވެސް އޭނާއަށް އޮފަރ އެއް ހުށަހަޅާފައިވާ ކަމަށެވެ. މީގެ ކުރިން އިޓަލީގެ ޔުވެންޓަސްއިން ވެސް ރަޝްފޯޑަށް ޝައުގުވެރިކަން ފާޅުކޮށްފައިވެއެވެ.

މޮރެޓޯ ބުނާ ގޮތުގައި މިލާނުން މިހާރު ވަނީ މެންޗެސްޓަރ ޔުނައިޓެޑާ އެކު މަޝްވަރާތައް ފަށާފައެވެ. އަދި ކުރިއަށް އޮތް ގަޑިތަކުގައި 27 އަހަރުގެ ރަޝްފޯޑް ގަތުމުގެ މަޝްވަރާތައް އިތުރަށް ކުރިއަށް ގެންދާނެ ކަމަށް ބުނެއެވެ.

ރަޝްފޯޑަކީ މެންޗެސްޓަރ ޔުނައިޓެޑްގެ އެކަޑަމީގައި ތަމްރީނު ލިބިގެން އައި ކުޅުންތެރިއެކެވެ. އޭނާއަކީ ޔުނައިޓެޑްގެ އެންމެ މަޝްހޫރު ކުޅުންތެރިންގެ ތެރޭގައި ހިމެނޭ ކުޅުންތެރިއެކެވެ. ނަމަވެސް މިހާރުގެ ކޯޗު ރޫބެން އަމޮރިމްގެ ދަށުން ރަޝްފޯޑަށް ގަވާއިދުން ކުޅުމުގެ ފުރުސަތު ނުލިބެއެވެ. ޔުނައިޓެޑާއި މައްސަލަ ޖެހި ޔުނައިޓެޑްގެ ފަހު 6 މެޗުގައި ކުޅުމުގެ ފުރުސަތު އޭނާއަކަށް ނުލިބިއެވެ. އެ 6 މެޗުގެ ތެރެއިން ބެންޗުގައި އިނުމުގެ ފުރުސަތު ވެސް ލިބުނީ އެންމެ މެޗަކުންނެވެ.

މެންޗެސްޓަރ ޔުނައިޓެޑްގެ އެންމެ މުސާރަ ބޮޑު ކުޅުންތެރިންގެ ތެރޭގައި ހިމެނޭ ރަޝްފޯޑް އަށް ހަފްތާއަކު ހަތަރު ލައްކަ ފަންސާސް ހަތް ހާސް އެމެރިކާ ޑޮލަރު މުސާރައިގެ ގޮތުގައި ލިބެއެވެ. މީޑިޔާ ރިޕޯޓްތައް ބުނެފައިވާ ގޮތުގައި އޭސީ މިލާނުން ވަނީ އޭނާގެ މުސާރައިގެ ބޮޑުބައި މެންޗެސްޓަރ ޔުނައިޓެޑް އިން ދިނުމަށްވެސް އެދިފަ އެވެ.