ކޫއްޑޫގައި މަސް ގަނެވޭ މިންވަރު އިތުރުކުރުމަށްޓަކައި 4000 ޓަނުގެ ކޯލްޑް ސްޓޯރޭޖެއް ތަރައްޤީކުރުމުގެ ޢަމަލީ މަސައްކަތް ފެށުމަށް ތައްޔާރުވެފައިވާ ކަމަށް މަސްވެރިކަމާއި ކަނޑުގެ ވަސީލަތްތަކާބެހޭ ވަޒީރު އަހުމަދު ޝިޔާމް ވިދާޅުވެއްޖެއެވެ.
މި މަޝްރޫޢަކީ ސަޢުދީ ފަންޑު ފޮރ ޑިވެލޮޕްމަންޓުގެ ލޯނު އެހީގައި ކުރިއަށްގެންދާ މަޝްރޫޢެކެވެ. މި މަޝްރޫޢު ޙަވާލުކޮށްފައިވަނީ ލަކީ ގްލޯބަލް ޕްރޮޖެކްޓްސް ޕްރައިވެޓް ލިމިޓެޑާއެވެ. މި މަސައްކަތް ޙަވާލުކޮށްފައިވަނީ 365 ދުވަހުގެ ތެރޭގައި މަޝްރޫޢުގެ މަސައްކަތް ނިންމާގޮތަށެވެ. މިއީ 6.6 މިލިޔަން ޑޮލަރުގެ މަޝްރޫޢެކެވެ.
ވަޒީރު ޝިޔާމް ވިދާޅުވެފައިވަނީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މަސްވެރިކަމުގެ ދާއިރާ ކުރިއެރުވުމަށް ވެވަޑައިގެންނެވި ވަޢުދުތައް ފުއްދަވަމުން ގެންދަވާ ކަމަށެވެ. އެގޮތުން މިހާރު މަސްވެރިންނަށް 48 ގަޑިއިރުތެރޭ ފައިސާ ދޫކުރަމުންދާ ކަމަށާއި، މަސްވެރިންނަށް ދިމާވެފައިވާ ގޮންޖެހުންތަކަށް ޙައްލު ހޯދައިދިނުމަށް މަސައްކަތް ކުރަމުންދާ ކަމަށްވެސް ވަޒީރު ވިދާޅުވިއެވެ.
Advertisement
މަސްވެރިކަމާބެހޭ ވުޒާރާއިން ބުނީ ކޫއްޑޫގެ ކެޕޭސިޓީ އިތުރުކުރުމުގެ މަސައްކަތްތަކުގެ ދަށުން ތަރައްޤީކުރާ 4000 ޓަނުގެ ކޯލްޑް ސްޓޯރޭޖުގެ ޑިޒައިން މަސައްކަތްތައް މިހާރު ނިމިފައިވާ ކަމަށެވެ. އަދި މަޝްރޫޢު ފެށުމަށްޓަކައި ކުރިއަށްގެންދަން ޖެހޭ ގިނަ މަސައްކަތްތައްވެސް މިހާރު ނިމިފައިވާއިރު ވަރަށް އަވަހަށް ޢަމަލީ މަސައްކަތްތައް ފެށިގެންދާނެ ކަމަށް އެ ވުޒާރާއިން ބުންޏެވެ.
މިހާރު ކޫއްޑޫގައި ހުރީ 2000 ޓަނުގެ ކޯލްޑް ސްޓޯރޭޖެކެވެ. މި އައު މަޝްރޫޢުގެ ސަބަބުން ކޫއްޑޫގެ ސްޓޯރޭޖު ކެޕޭސިޓީ 6000 މެޓްރިކް ޓަނަށް އިތުރުވެގެންދާނެއެވެ. މިއީ ސަރުކާރުގެ އަމާޒުކަމުގައިވާ މުޅި ރާއްޖޭގެ މަހުގެ ސްޓޯރޭޖް ކެޕޭސިޓީ 25,000 ޓަނަށް އިތުރުކުރުމުގެ މަސައްކަތުގެ ބައެކެވެ.
ވަޒީރު ޝިޔާމް ވިދާޅުވެފައިވަނީ ހުވަދު އަތޮޅަކީ މަސްވެރިކަމުގެ ސިނާޢަތުގައި ހަރަކާތްތެރިވާ ގިނަ ބަޔަކު ދިރިއުޅެމުންދާ އަތޮޅެއް ކަމަށެވެ. އަދި ސަރުކާރުން މަސްވެރިކަމުގެ ސިނާއަތް ތަރައްޤީކޮށް ކުރިއެރުވުމަށް އިސްކަންދޭ ކަމަށާއި، މަސްވެރިކަމުގެ ދާއިރާ ފުޅާކޮށް ކުރިއެރުވުމަށް ގިނަ މަޝްރޫޢުތަކެއް ކުރިއަށް ގެންދިޔުމަށް ރާވާފައިވާ ކަމަށްވެސް ވަޒީރު ވިދާޅުވިއެވެ.
މިހާރު ރާއްޖޭގެ ކޯލްޑު ސްޓޯރޭޖުގެ ކެޕޭސިޓީއަކީ 8,500 ޓަނެވެ. ސަރުކާރުގެ އަމާޒަކީ މި ދައުރުތެރޭގައި އިތުރު 15,500 ޓަނު މުޅި ރާއްޖޭގައި އިތުރުކޮށް، ޖުމްލަ 25,000 ޓަނަށް މުޅި ރާއްޖޭގެ މަހުގެ ސްޓޯރޭޖް ކެޕޭސިޓީ އިތުރުކުރުމެވެ.
ސަރުކާރުން ބުނެފައިވާ ގޮތުގައި ރާއްޖޭގައި އެކަށީގެންވާ ސްޓޯރޭޖް ކެޕޭސިޓީ ނެތުމުގެ ސަބަބުން ރާއްޖެއިން ވިއްކާ މަހަށް ރަނގަޅު އަގެއް ނުލިބެއެވެ. މީގެ ސަބަބުން ބާނާ މަހުގެ 65 އިންސައްތަ ރޯ މަހުގެ ގޮތުގައި ބޭރުކުރަމުންދާ ކަމަށްވެސް ސަރުކާރުން ބުނެފައިވެއެވެ.
