މި އަހަރުގެ ފުރަތަމަ ފަސް ދުވަހު ރާއްޖެއަށް 32،300 އަށް ވުރެ ގިނަ ޓޫރިސްޓުން ޒިޔާރަތް ކޮށްފިއެވެ.

އެއީ މިދިޔަ އަހަރުގެ އެ މުއްދަތަށް ވުރެ 17 ޕަސެންޓު އިތުރު އަދަދެކެވެ. މިދިޔަ އަހަރުގެ ފުރަތަމަ ފަސް ދުވަހު ރާއްޖެއަށް އައިސްފައި ވަނީ 27،000 ޓޫރިސްޓުންނެވެ.

ޓޫރިޒަމް މިނިސްޓްރީގެ ހިސާބުތަކުން ދައްކާ ގޮތުގައި، މި އަހަރުގެ ފުރަތަމަ ފަސް ދުވަހު އެންމެ ގިނަ ޓޫރިސްޓުން އައިސްފައި ވަނީ ރަޝިއާއިންނެވެ. ފުރަތަމަ ފަސް ދުވަހުގެ ތެރޭގައި ރަޝިއާ އިން ވަނީ 6،400 ޓޫރިސްޓުން އައިސްފަ އެވެ. އެއީ ފުރަތަމަ ފަސް ދުވަހު އައި ޖުމްލަ ޓޫރިސްޓުންގެ 20 ޕަސެންޓެވެ.

ދެވަނައަށް އެންމެ ގިނަ ޓޫރިސްޓުން އައީ އިންޓަލީނެވެ. އެ ގައުމުން ވަނީ 5،200 ޓޫރިސްޓުން އައިސްފަ އެވެ.

ތިންވަނައަށް އެންމެ ގިނަ ޓޫރިސްޓުން އައި އިނގިރޭސިވިލާތުން 2،100 ޓޫރިސްޓުން އައިސްފައިވާއިރު، ހަތަރުވަނައަށް އެންމެ ގިނަ ޓޫރިސްޓުން އައީ ޖަރުމަނުންނެވެ. އެ ގައުމުން 2،000 ޓޫރިސްޓުން އައިސްފައިވެ އެވެ.

ރާއްޖެއަށް ޓޫރިސްޓުން އެންމެ ގިނައިން އަންނަ ގައުމުތަކުގެ ލިސްޓުގެ ފަސްވަނައިގައި އޮތީ އިންޑިއާ އެވެ. އެ ގައުމުން ވަނީ 1،100 ޓޫރިސްޓުން އައިސްފަ އެވެ. އަދި އެމެރިކާއިން ވަނީ 1،000 ޓޫރިސްޓުން އައިސްފަ އެވެ.

މިދިޔަ އަހަރު އެންމެ ގިނަ ޓޫރިސްޓުން އައި ޗައިނާ އުޅެނީ ލިސްޓުގެ ނުވަވަނައިގަ އެވެ. އެ ގައުމުން މި އަހަރުގެ މިހާތަނަށް އައީ 800 ޓޫރިސްޓުންނެވެ.

މިދިޔަ އަހަރު ނިމުނު އިރު ޗައިނާ އިން ވަނީ 260،000 ޓޫރިސްޓުން އައިސްފަ އެވެ. މިދިޔަ އަހަރު ރަޝިއާ އިން ވަނީ 224،000 ޓޫރިސްޓުން ރާއްޖެ އައިސްފަ އެވެ. ރަޝިއާއަކީ މިދިޔަ އަހަރު ދެވަނައަށް އެންމެ ގިނައިން ޓޫރިސްޓުން އައި ގައުމެވެ.