ރާއްޖެއިން ޙައްޖަށް މީހުން ގެންދިއުމާބެހޭ އުސޫލަށް މުހިންމު މުހިންމު ބަދަލުތަކެއް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ގެންނަވައިފިއެވެ. މި ބަދަލުތައް ގެނައީ އިސްލާމީ ކަންތައްތަކާބެހޭ ވުޒާރާއިން ހުށަހެޅުއްވި ކަރުދާހަކާއި ގުޅިގެން ވަޒީރުންގެ މަޖިލީހުގައި މަޝްވަރާކުރެއްވުމަށްފަހު ކަމަށް ރައީސް އޮފީހުން ހާމަކުރިއެވެ.

މި އައު އުސޫލުގެ ދަށުން، ޙައްޖުގެ އަޅުކަން އަދާނުކޮށް ތިބި މީހުންނަށް އިސްކަންދޭގޮތަށް ވަނީ ހަމަޖައްސަވާފައެވެ. މި ބަދަލުތައް ގެންނެވުމުގެ މައިގަނޑު މަޤްޞަދަކީ މޯލްޑިވްސް ޙައްޖު ކޯޕަރޭޝަން ލިމިޓެޑަށް ފައިސާ ދެއްކުމަށްފަހު، ފަރުޟު ޙައްޖު އަދާކުރުމަށް ދިގު އިންތިޒާރެއްގައި ތިބި ރައްޔިތުންނަށް ޙައްލެއް ހޯދައިދިނުމެވެ. މި އިސްލާޙުތަކާ އެއްގޮތަށް އަމަލުކުރަން ފަށާނީ އަންނަ އަހަރުން ފެށިގެންނެވެ.

އައު އުސޫލުގެ ދަށުން:

1. އަލަށް ޙައްޖުގެ އަޅުކަން އަދާކުރަން އެދޭ ފަރާތްތަކަށް އިސްކަންދެވޭނެއެވެ.
2. ޙައްޖުގެ އަޅުކަން އަދާކޮށްފައިނުވާ 65 އަހަރުން މަތީގެ މީހުންނަށް ވަކި އިންސައްތައެއް ޚާއްޞަކުރެވޭނެއެވެ.
3. 75 އަހަރުން މަތީގެ ފަރާތްތަކަށް، ސިއްޙީ ހާލަތަށް ބަލައި އެހީތެރިއަކު ގެންދިއުމުގެ ފުރުޞަތު ދެވޭނެއެވެ.
4. ކުރިން ޙައްޖުގެ އަޅުކަން އަދާކޮށްފައިވާ ފަރާތްތަކަށް އިތުރު ފުރުޞަތެއް ދެވޭނީ އެންމެ ފަހުން ޙައްޖުގެ އަޅުކަން އަދާކުރިތާ ހިޖުރީ ސަނަތުން ފަސް އަހަރު ވުމުންނެވެ.

މީގެއިތުރުން، ސަރުކާރުން ވަނީ ރާއްޖެއަށް ލިބޭ ރަސްމީ ޙައްޖު ކޯޓާ އިތުރުކުރުމަށް މަސައްކަތްތަކެއް ކުރަމުންދާ ކަމަށްވެސް ހާމަކޮށްފައެވެ.