ކުންފުނީގެ ޢާމްދަނީ އިތުރުކުރުމަށްޓަކައި ޚިދުމަތްތަކާއި ވިޔަފާރި ފުޅާކުރުމުގެ މަސައްކަތް ކުރަމުންދާ ކަމަށް އެމްޑަބްލިއުއެސްސީގެ މެނޭޖިންގ ޑިރެކްޓަރ ޢަބްދުލްމަތީން މުޙައްމަދު ވިދާޅުވެއްޖެއެވެ. ޕީއެސްއެމް ނިއުސްގެ ރާއްޖެ މިއަދު ޕްރޮގްރާމްގައި ވާހަކަދައްކަވަމުން އޭނާ ވިދާޅުވީ، މިހާރު ކުންފުނީގެ މަސައްކަތްތަކުގެ 55 އިންސައްތައަކީ ޔޫޓިލިޓީގެ ޚިދުމަތްތައް ކަމަށާއި، 45 އިންސައްތައަކީ ވިޔަފާރި މަސައްކަތްތައް ކަމަށެވެ.

"މިހާރު އަމާޒަކީ މި ރޭޝިއޯ ބަދަލުކޮށް ޔޫޓިލިޓީގެ ޚިދުމަތަކީ ކުންފުނީގެ ޢާމްދަނީގެ 40 އިންސައްތައަށް ހަދާ، 60 އިންސައްތައަކީ ޢާމްދަނީ ލިބޭނެ އެހެން މަސައްކަތްތަކަށް ހެދުން," މަތީން ވިދާޅުވިއެވެ.

އެމްޑަބްލިއުއެސްސީގެ މައިގަނޑު ޔޫޓިލިޓީ ޚިދުމަތްތަކުގެ ތެރޭގައި މާލެ ސަރަޙައްދުގެ ފެނުގެ ޚިދުމަތްތައް ފޯރުކޮށްދިނުމާއި، ރ. ދުވާފަރުގެ ފެނާއި ކަރަންޓާއި ނަރުދަމާގެ އިތުރުން ކުނި މެނޭޖްކުރުމުގެ މަސައްކަތް ހިމެނެއެވެ. ވިޔަފާރި އުސޫލުން، ކުންފުނިން ދަނީ ރަށްރަށުގައި ފެނާއި ނަރުދަމާގެ ޚިދުމަތް ޤާއިމުކުރުމުގެ މަޝްރޫޢުތައް ކުރިއަށްގެންދަމުންނެވެ.

2024 ވަނަ އަހަރު 20 ރަށެއްގެ މަސައްކަތް ނިންމާލާފައިވާއިރު، 2025 ވަނަ އަހަރު އިތުރު 20 ރަށެއްގެ މަސައްކަތް ފަށާފައިވާކަމަށް އެމްޑަބްލިއުއެސްސީން ބުނެއެވެ. މީގެ އިތުރުން، ބޯފެން، ފުޅީގައި ބަންދުކޮށް ވިއްކުމުގެ މަސައްކަތް ވެސް ފުޅާ ދާއިރާއެއްގައި ކުރިއަށް ގެންދާކަމަށް ކުންފުނިން ހާމަކޮށްފައި ވެއެވެ.

މި ބަދަލުތަކާއެކު ފެނުގެ ޚިދުމަތް އަގުހެޔޮކޮށް ދެމެހެއްޓެނިވި ގޮތެއްގައި ފޯރުކޮށްދިނުމަށް މަގުފަހިވާނެކަމަށް އެމްޑަބްލިއުއެސްސީގެ މެނޭޖިންގ ޑިރެކްޓަރ ޢަބްދުލްމަތީން މުޙައްމަދު ވިދާޅުވެފައިވެއެވެ.