ސަރުކާރު ހިއްސާވާ ކުންފުނިތައް (އެސްއޯއީ) އިޞްލާޙުކުރެއްވުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ނިންމަވާފައިވާ ނިންމެވުންތަކަކީ، އިސްރާފު ކުޑަ، ވަރުގަދަ އަދި މާލީ ގޮތުން ދެމެހެއްޓެނިވި ދައުލަތުގެ ހިދުމަތުގެ ދާއިރާއެއް ބިނާކުރުމަށް އެޅުނު ވަރަށް މުހިންމު ފިޔަވަޅެއް ކަމަށް އެމްޑަބްލިއުއެސްސީގެ މެނޭޖިންގ ޑިރެކްޓަރު ހުސައިން ފަހުމީ ވިދާޅުވެއްޖެއެވެ.
އެސްއޯއީތަކަށް ގެންނަން ނިންމާފައިވާ ބަދަލުތަކާ ގުޅޭގޮތުން އެކްސްގައި ކުރެއްވި ޕޯސްޓެއްގައި ފަހުމީ ވިދާޅުވީ، ކުންފުނިތަކުގެ މަސައްކަތްތައް އެއްފުރާޅެއްގެ ދަށަށް ބަދަލުކުރުމާއި، ބޭކާރު ޚަރަދުތައް ނައްތާލުމަކީ ދައުލަތުގެ މާލިއްޔަތަށް ބޮޑު ލުޔެއް ލިބިގެންދާނެ ކަމެއް ކަމަށެވެ. އަދި ކޯޕަރޭޓް ގަވަރނަންސް ހަރުދަނާކޮށް، ގައުމީ އިސްތިރާޖީ މިލްކުވެރިކަން ވަރުގަދަކުރުމުން އެސްއޯއީތަކުން ދޭންޖެހޭ އެންމެ މުހިންމު ޚިދުމަތްތަކަށް އިސްކަންދެވި، އެ ކުންފުނިތަކުގެ އަމާޒަށް ވާސިލުވުމަށް މަގުފަހިވެގެންދާނެ ކަމަށްވެސް އޭނާ ފާހަގަކުރެއްވިއެވެ.
މީގެއިތުރުން، މި ނިންމެވުމުގެ ސަބަބުން ކުންފުނިތަކުގެ ހިންގުން ހަރުދަނާވެ، ކަންކަމުގައި ޒިންމާދާރުކަން އިތުރުވެގެންދާނެ ކަމަށާއި، އޭގެ އެންމެ ބޮޑު ފައިދާއެއް ކުރާނީ ދިވެހި ރައްޔިތުންނަށް ކަމަށް ފަހުމީ ވިދާޅުވިއެވެ. އެގޮތުން، ރައްޔިތުންނަށް ފޯރުކޮށްދޭ ހިދުމަތްތަކުގެ ފެންވަރު ރަނގަޅުވެ، އެންމެ އެދެވޭ އަދި އިތުބާރު ހުރި ޚިދުމަތްތަކެއް ލިބިގެންދާނެ ކަމަށް އޭނާ ވިދާޅުވިއެވެ.
Advertisement
ފަހުމީ އިތުރަށް ފާހަގަކުރެއްވި ގޮތުގައި، ގައުމަކަށް މާނަހުރި އިސްލާހީ ބަދަލުތަކެއް ގެނެވޭނީ މިފަދަ އުނދަގޫ ނިންމެވުންތައް ނިންމަން ކެރިގެން އަދި އެކަންކަން ތަންފީޒުކުރުމުގެ ވަރުގަދަ އަޒުމެއް އޮވެގެންނެވެ. އަދި ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ މި ނިންމެވުމަކީ ސާފު މަގްސަދެއްގައި، ދުރުވިސްނުމާ އެކު ދިވެހި ގައުމުގެ މުސްތަޤްބަލަށްޓަކައި ނިންމެވި ވަރަށް ހަރުދަނާ އިސްލާހީ ނިންމެވުމެއް ކަމަށްވެސް އޭނާ ވިދާޅުވިއެވެ.
