މޯލްޑިވްސް މާކެޓިންގ އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ) އިން އިންތިޒާމްކޮށްގެން ބާއްވާ 2025 ވަނަ އަހަރުގެ އެންމެ ބޮޑު ގްލޯބަލް ކެމްޕޭން "ދަ ވޯލްޑްސް ބިގެސްޓް ގިވްއަވޭ" މިއަދު ރަސްމީކޮށް ފަށައިފިއެވެ. މި ކެމްޕޭންގައި 2025 ވަނަ އަހަރުގެ ކޮންމެ ހަފުތާއަކަށް އެއް ޗުއްޓީއާއެކު ޖުމްލަ 52 ޗުއްޓީ، ހިލޭ ދިނުމަށް ވަނީ ހަމަޖެހިފައެވެ.

މި ކެމްޕޭން ފުރަތަމަ އިއުލާނުކޮށްފައިވަނީ 2024 ވަނަ އަހަރުގެ ނޮވެމްބަރު 5 ވަނަ ދުވަހު ލަންޑަންގައި ބޭއްވި ވޯލްޑް ޓްރެވަލް މާޓް (ޑަބްލިއުޓީއެމް) ގައެވެ. މި ގިވްއަވޭގައި ކޮންމެ މަހަކު ސޯޝަލް މީޑިއާ މެދުވެރިކޮށް ބާއްވާ މުބާރާތްތަކުގައި ނަސީބުވެރި ފަރާތްތަކަށް ހިތްގައިމު ޗުއްޓީއެއްގެ ފުރުސަތު ލިބިގެންދާނެއެވެ.

މި މުބާރާތްތަކުގައި ރާއްޖޭގެ ރީތި ގޮނޑުދޮށްތަކާއި، ސާފު މޫދާއި، ޤުދުރަތީ ރީތިކަމާއި، މުއްސަނދި ސަގާފަތާއި ކަނޑުގެ ދިރުންތަކަށް އަލިއަޅުވާލާއިރު ރޮމޭންސް، ލަގްޒަރީ، ފެމިލީ، ޑައިވިންގ އަދި އެހެނިހެން ހިތްގައިމު ތަފާތު ދާއިރާތަކަށް ވެސް އަލިއަޅުވާލާނެއެވެ.

އެމްއެމްޕީއާރުސީން ބުނީ މި ކެމްޕޭންގެ މައިގަނޑު މަޤްޞަދަކީ ސޯޝަލް މީޑިއާގެ ޒަރީޢާއިން ބައިނަލްއަޤްވާމީ ފަރާތްތަކުގެ ބައިވެރިވުމާއެކު ރާއްޖެއަށް ގިނަ ފަތުރުވެރިން އައުމަށް ޝައުޤުވެރިކުރުވުން ކަމަށެވެ. އަދި ރާއްޖެއަކީ އަހަރުގެ ކޮންމެ އިރެއްގައި ވެސް ޒިޔާރަތްކުރެވޭނެ މަންޒިލެއްގެ ގޮތުގައި އިޝްތިހާރުކުރުމަކީ ވެސް މަޤްޞަދެއްކަމަށް އެ ކުންފުނިން ބުންޏެވެ.

އެމްއެމްޕީއާރުސީއިން ބުނިގޮތުގައި އެ ކުންފުނިން މަސައްކަތްކުރަމުން ގެންދަނީ ދިވެހިރާއްޖޭގެ ވޯލްޑްސް ލީޑިން ޑެސްޓިނޭޝަންގެ މަގާމު ދެމެހެއްޓުމަށެވެ. އެގޮތުން 2025 ވަނަ އަހަރުގެ އަމާޒަކީ 25 މާކެޓެއްގައި ކޮންމެ ކުއާޓަރއެއްގައި ވެސް ހޫނު މޫސުމުގެ ބޮޑެތި ކެމްޕޭންތައް ހިންގުން ކަމަށް ވެސް އެމްއެމްޕީއާރުސީއިން ފާހަގަކުރިއެވެ.