ރާއްޖޭގެ ފަތުރުވެރިކަން އިތުރަށް ކުރިއަރުވައި، ޗައިނާ މާކެޓް އިތުރަށް ފުޅާކުރުމުގެ މަގުސަދުގައި މިނިސްޓްރީ އޮފް ޓޫރިޒަމް އެންޑް ސިވިލް އޭވިއޭޝަންގެ އިސް ވަފުދެއް ޗައިނާއަށް ރަސްމީ ދަތުރެއް ފަށައިފިއެވެ.

މި މަހުގެ 1 އިން 11 ޖުލައި 2026 އަށް ބޭއްވޭ މި ދަތުރުގައި މިނިސްޓްރީ އޮފް ޓޫރިޒަމް އެންޑް ސިވިލް އޭވިއޭޝަން، ވިޒިޓް މޯލްޑިވްސް، މޯލްޑިވްސް އެއަރޕޯޓްސް ކޮމްޕެނީ ލިމިޓެޑް، އަދި މޯލްޑިވިއަން އިތުރުން، ޓޫރިޒަމް ދާއިރާގެ މުހިންމު ޖަމިއްޔާތަކެއް ވެސް ބައިވެރިވެއެވެ.

ވަފުދުގެ އެންމެ އިސް ބޭފުޅަކީ މިނިސްޓަރ އޮފް ސްޓޭޓް ފޯ ޓޫރިޒަމް އެންޑް ސިވިލް އޭވިއޭޝަން، އަލްފާޟިލް ހާރިސް މުހައްމަދެވެ. އަދި ވިޒިޓް މޯލްޑިވްސްގެ ފަރާތުން ސީއީއޯ އަދި މެނޭޖިންގ ޑިރެކްޓަރ އިބްރާހިމް ޝިއުރީ ވެސް ބައިވެރިވެއެވެ.

މި ދަތުރުގައި ބެއިޖިންގ، ޝަންހާއީ އަދި ޗެންގްޑޫ އަށް ޒިޔާރަތްކޮށް، ޗައިނާ ސަރުކާރުގެ އިސްވެރިން، އެއަރލައިންތައް، ޓުއާ އޮޕަރޭޓަރުން، ޓްރެވަލް އެޖެންޓުން އަދި ޓްރެވަލް ޓެކްނޮލޮޖީ ކުންފުނިތަކާ ބައްދަލުކުރުމަށް ރޭވިފައިވެއެވެ. އަދި ރާއްޖޭގެ ޓޫރިޒަމް އިޝްތިހާރުކުރުމަށް ހާއްސަ ނެޓްވޯކިންގ ހަރަކާތްތަކެއް ވެސް ބޭއްވޭނެއެވެ.

މެދުއިރުމަތީގެ ހާލަތާއި ދުނިޔޭގެ ބަދަލުތަކާއެކު ކުރިމަތިވާ ގޮންޖެހުންތަކުގެ މެދުގައި ވެސް، މުހިންމު މާކެޓްތަކާ ގުޅުން ބަދަހިކޮށް، ރާއްޖެއަށް ފަތުރުވެރިން އިތުރަށް ގެނައުމަކީ މި ދަތުރުގެ މުހިންމު އަމާޒެވެ.

ތަފާސް ހިސާބުތައް ދައްކާގޮތުން، މި އަހަރުގެ މިހާތަނަށް 168,677 އަށް ވުރެ ގިނަ ޗައިނާގެ ފަތުރުވެރިން ދިވެހިރާއްޖެ ޒިޔާރަތްކޮށްފައިވެއެވެ. މިއީ ވޭތުވެދިޔަ އަހަރާ އަޅާބަލާއިރު 19.8 ޕަސެންޓުގެ ކުރިއެރުމެކެވެ. ޗައިނާ އަކީ ދިވެހިރާއްޖޭގެ ޓޫރިޒަމްގެ އެންމެ ބޮޑު މާކެޓްތަކުގެ ތެރޭގެ އެއް މާކެޓެވެ.