އެމެރިކާގެ ފެޑެރަލް ކޯޓަކުން އިންތިހާބީ ރައީސް ޑޮނަލްޑް ޓްރަމްޕާއި ދެކޮޅަށް ކުރީގެ ލިޔުންތެރިއެއް ކަމަށްވާ އީ. ޖީން ކެރޯލް ހުށަހެޅި ޖިންސީ ގޯނާގެ މައްސަލައިގައި އޭނައަށް ފަސް މިލިއަން ޑޮލަރު ދައްކަން އަމުރުކުރި ހުކުމަށް ތާއީދުކޮށްފި އެވެ.ފްރާންސްގެ ނޫސް އެޖެންސީ އޭއެފްޕީ އިން ބުނާ ގޮތުގައި ލިޔުންތެރިޔާ ޖީން ކެރޯލް ޑޮނަލްޑް ޓްރަމްޕާ ދެކޮޅަށް ޖިންސީ ގޯނާ އާއި އަބުރުގެ ދައުވާ އުފުލާފައިވާއިރު، އެ ދައުވާގައި ކޯޓުން ވަނީ ފައިސާ ދިނުމަށް ޑޮނަލްޑް ޓްރަމްޕަށް އަމުރުކޮށްފަ އެވެ.
ދައުވާގައި ބުނަނީ 1996 ވަނަ އަހަރު މެންހަޓަންގެ ޑިޕާޓްމަންޓް ސްޓޯރެއްގެ ޑްރެސިންގ ރޫމްގެ ތެރޭގައި ކަރޯލް އަށް ޓްރަމްޕް ޖިންސީ އަނިޔާކުރި ކަމަށެވެ.
އެ ހުކުމުގައި ޓްރަމްޕަށް ވަނީ ޖިންސީ ގޯނާގެ ކުށުގައި ދެ މިލިއަން ޑޮލަރު އަދި އަބުރުގެ ކުށުގައި ތިން މިލިއަން ޑޮލަރު ދައްކަން އަންގާފަ އެވެ.
ޑޮނަލްޑް ޓްރަމްޕް ވަނީ އެ ދައުވާ އިސްތިއުނާފުކޮށް، އޭނާގެ މައްޗަށް ޖިންސީ ގޯނާގެ ތުހުމަތު ކުރި އިތުރު ދެ އަންހެނުންނަށް އެ މައްސަލައިގައި ހެކިބަސް ދިނުމުގެ ހުއްދަ ދީގެން ނުވާނެ ކަމަށް ބުނެފަ އެވެ.
ތިން ފަނޑިޔާރުންގެ ޕެނަލަކުން އިސްތިއުނާފު ބަލައި ނުގަތެވެ. އަދި އިއްތިފާޤުވަނީ ޑިސްޓްރިކްޓް ކޯޓުގެ ހުކުގައި ގޯހެއް އުޅޭކަން ޓްރަމްޕަށް ކަށަވަރު ކޮށްދެވިފައި ނުވާ ކަމަށެވެ.
އަދި އީ ޖޭން ކެރޯލް ހުށަހެޅި ދައުވާއެއްގައި ޓްރަމްޕަށް 8.3 މިލިއަން ޑޮލަރު ދެއްކުމަށް ވެސް އިތުރު ޖޫރީން ވަނީ އަމުރުކޮށްފަ އެވެ.
އެ ނިންމުން އަލުން އިސްތިއުނާފު ކުރާނެ ކަމަށް ޑޮނަލްޑް ޓްރަމްޕްގެ ތަރުޖަމާނު ސްޓީވަން ޗެއުންގް ވިދާޅުވެއްޖެ (ފޮޓޯ: ރޮއިޓާސް)
