މާލެއާއި ހުޅުމާލޭގެ ފެނުގެ ވިއުގަ ގުޅާލުމުގެ މަސައްކަތް 2025 ވަނަ އަހަރުގެ ކުރީކޮޅު ނިމޭނެ ކަމަށް މޯލްޑިވްސް ވޯޓަރ އެންޑް ސުވަރޭޖް ކޮމްޕެނީ (އެމްޑަބްލިއުއެސްސީ) ގެ މެނޭޖިން ޑިރެކްޓަރ ޢަބްދުލްމަތީން މުޙައްމަދު ވިދާޅުވެއްޖެއެވެ.

ދައުލަތުގެ މީޑިއާ ޕޮރޮގްރާމެއްގައި ވާހަކަދައްކަވަމުން އެމްޑަބްލިއުއެސްސީގެ މެނޭޖިން ޑިރެކްޓަރ މަތީން ވިދާޅުވީ، މި މަޝްރޫޢު މިހާތަނަށް ލަސްވެފައިވަނީ ވޭތުވެދިޔަ ސަރުކާރުތަކުގައި ފެނުގެ ވިއުގައިގެ ޕަމްޕް ސްޓޭޝަން ހަދަން ބިން ހަމަޖައްސާފައި ނުވާތީ ކަމަށެވެ. ނަމަވެސް މިހާރު އެ މައްސަލަ ޙައްލުކޮށް، ޕަމްޕް ސްޓޭޝަންގެ މަސައްކަތް ބާރު ދުވެލީގައި ކުރިއަށްދާ ކަމަށް މަތީން ވިދާޅުވިއެވެ.

"ހައެއްކަ އަހަރު ވޭތުވެދިޔައިރު ޕަމްޕް ސްޓޭޝަނަށް ބިން ހަމަޖައްސާފައެއް ނެތް. އެތައް އަހަރެއް އެދިޔައީ މަސައްކަތް ނުނިމި. އެކަމަކު މިހާރު ބިން ހަމަޖައްސާ ޕަމްޕް ސްޓޭޝަންގެ މަސައްކަތް އެ ދަނީ ބާރަށް ކުރިއަށް،" މަތީން ވިދާޅުވިއެވެ

މާލެއާއި ހުޅުމާލޭގެ ފެނުގެ ވިއުގަ ގުޅާލުމަށް ބޭނުންވާ މައި ނެޓްވޯކް އެޅުމުގެ މަސައްކަތްތައް ކޮށްފައިވަނީ 2018 ވަނަ އަހަރު، ސިނަމާލެ ބްރިޖްގެ މަސައްކަތާއެކުގައެވެ. ނަމަވެސް މިހާތަނަށްވެސް އެ މަސައްކަތް ނިންމާ ޚިދުމަތް ފަށާފައެއް ނުވެއެވެ.

މި މަޝްރޫޢަކީ އެމްޑަބްލިޔުއެސްސީގެ "ވޯޓަރ ސެކިއުރިޓީ ޕްލޭން" ގެ ދަށުން 2016 ވަނަ އަހަރު ފެށި މަސައްކަތެކެވެ. މި ޕްލާންޓާއެކު، މާލެ ނުވަތަ ހުޅުމާލެއިން ފެން ކެނޑޭ ޙާލަތުގައި ވަގުތުން އެއް ރަށުން އަނެއް ރަށަށް ފެން ފޯރުކޮށްދެވޭނެއެވެ.

މަތީން ވިދާޅުވިގޮތުގައި ހުޅުމާލެއާއި މާލޭގައި އަޅާ ފެނުގެ ވިއުގައަކީ ގަޑިއަކު 800 ޓަނުގެ ފެން ދައުރުކުރެވޭނެ ނިޒާމެކެވެ. މާލެ ސަރަޙައްދުގައި އިތުރުވަމުން އަންނަ އާބާދީއާއެކު މި ޚިދުމަތަކީ، ފެނުގެ ރައްކާތެރިކަން އިތުރުކުރުމަށް މުހިންމުވެފައިވާ މަޝްރޫޢުއެކެވެ.