ސިނަމާލެ ބްރިޖާއި ގުޅިފައިވާ ހަލިމަގުގައި ސައިކަލެއް އޯވަޓޭކް ކުރަން އުޅުމުގެ ތެރޭގައި ތިން ސައިކަލު ޖެހި އެކްސިޑެންޓެއް ހިނގައިފިއެވެ.

މި އެކްސިޑެންޓެއް ހިނގާފައިވަނީ ރޭ 12:11 ގައި ކަމަށް ފުލުހުން ބުންޏެވެ.

ފުލުހުން ބުނީ، މި އެކްސިޑެންޓް ހިނގީ ސިނަމާލެ ބްރިޖްގެ މާލެއިން ހުޅުމާލެއަށް ދަތުރުކުރާ ފަޅީގެ ހަލިމަގުގައި ކަމަށެވެ. އެކްސިޑެންޓް ހިނގަން މެދުވެރިވީ އެއް ސައިކަލު އަނެއް ސައިކަލު އޯވަޓޭކް ކުރަން އުޅުމުގެ ތެރޭގައި ދެ ސައިކަލު ޖެހި، އޭގެ ފަހަތުން އައި އެހެން ސައިކަލެއް ޖެހުމުން ކަމަށް ފުލުހުން ބުންޏެވެ.

މި އެކްސިޑެންޓްގައި ޖުމްލަ ފަސް މީހުންނަށް އަނިޔާވެފައިވާ ކަމަށް ފުލުހުން ބުންޏެވެ. އޭގެ ތެރެއިން ހަތަރު މީހަކަށް ފަރުވާ ދިނުމަށްފަހު ރޭ ވަނީ ދޫކޮށްލާފައެވެ. އަނެއް މީހާއަށް ޓްރީޓޮޕް ހޮސްޕިޓަލުގައި ފަރުވާދެމުންދާއިރު، އެމީހާގެ ޙާލަތު ސީރިއަސް ނޫން ކަމަށް ވެސް ހޮސްޕިޓަލާ ޙަވާލާދީ ފުލުހުން ބުންޏެވެ.

ފުލުހުން އިތުރަށް ބުނީ، މި އެކްސިޑެންޓްގައި ޤަވާޢިދާ ޚިލާފަށް ދުއްވި ސައިކަލު ޓޯވްކޮށްފައިވާ ކަމަށާއި، މައްސަލައިގެ ތަޙުޤީޤު ކުރިއަށްދާ ކަމަށެވެ.

ސައިކަލު ދުއްވުމުގައި ސަލާމަތީ ފިޔަވަޅުތައް އެޅުމަށާއި، ޓްރެފިކް ޤަވާޢިދުތަކަށް ޙުރުމަތްތެރިކޮށް ހިތުމަށް ފުލުހުން އާންމުންނަށް އިލްތިމާސްކޮށްފައިވެއެވެ.