ސެންސިރޯގައި ރޯމާއާ ދެކޮޅަށް ކުޅުނު މެޗު 1-1 އިން އެއްވަރުވުމުން އޭސީ މިލާންގެ ހެޑް ކޯޗުކަމުގެ މަގާމުން ޕައުލޯ ފޮންސެކާ ދޫކޮށްލާނެކަން އޭނާ ކަށަވަރުކޮށްދީފި އެވެ. ރޭ ދަންވަރު ނޫސްވެރިންނާއި ވާހަކަ ދައްކަމުން ފޮންސެކާ ވަނީ އެ ނިންމުމަށް އިއުތިރާފުވެފައެވެ.
"ތެދެއް، އަހަރެން މިލާނުން ބޭރުގައި މިހުރީ. މިއީ ދިރިއުޅުން. އަހަރެންގެ ޟަމީރު ސާފު، ސަބަބަކީ އަހަރެންނަށް ކުރެވެން އޮތް ހުރިހާ ކަމެއް ކުރިތީ" ފޮންސެކާ ބުންޏެވެ.
މިކަން އިއުލާން ކުރީ އޭނާގެ ބަދަލުގައި ސާޖިއޯ ކޮންސެއިސާއޯ ހަމަޖައްސާފައިވާ ކަމަށް ނިންމާފައިވާ ކަމުގެ ރިޕޯޓްތައް ދައުރުވަމުން ދިއުމުންނެވެ.
Advertisement
މިލާނުގައި ފޮންސެކާގެ ދައުރު ފެށުނީ 2024 ވަނަ އަހަރުގެ ޖޫން މަހު އެވެ. އޭނާ ވަނީ ސެރީއާ އާއި ޗެމްޕިއަންސް ލީގާއި ކޮޕާ އިޓަލީގައި ކުޅުނު 24 މެޗުގެ ތެރެއިން 12 މެޗުން މޮޅުވެފައެވެ. އަނެއް 12 މެޗުގެ ތެރެއިން 6 މެޗުން އެއްވަރުވިއިރު 6 މެޗުން ވީ ބައްޔެވެ.
ފޮންސެކާ ބޭރުކޮށްލުމަށްފަހު، ޕޯޓޯގެ ކުރީގެ ކޯޗު ސާޖިއޯ ކޮންސެއިސާއޯ މިލާނުގެ ކޯޗުކަމާ ހަވާލުވާނެ ކަމަށް ގިނަ ބަޔަކު ލަފާކުރެއެވެ. މިލާނަށް ދެން އެންމެ އަވަހަށް އޮތް މެޗަކީ ކުރިއަށް އޮތް ސުޕަކޮޕާ އިޓަލީނާގެ ސެމީ ފައިނަލުގައި ޔުވެންޓަސްއާ ދެކޮޅަށް ކުޅޭ މެޗެވެ..
ސެރީއޭގައި އޭސީ މިލާން މިވަގުތު އޮތީ 17 މެޗުން ލިބުނު 27 ޕޮއިންޓާއެކު 8 ވަނައިގައެވެ. ރޭ މިލާން އަށް ބަލި ނުކުރެވުނު ރޯމާ އޮތީ އިތުރަށް އެއް މެޗު ކުޅެގެން 20 ޕޮއިންޓާއެކު 10 ވަނައިގައެވެ. އެއްވަނައިގައި އޮތް އެޓަލަންޓާ އާއި ދެވަނައިގައި އޮތް ނަޕޯލީއަށް 18 މެޗުން ލިބިފައިވަނީ 41 ޕޮއިންޓެވެ. 3 ވަނައިގައި އޮތް އިންޓަ އަށް 17 މެޗުން ލިބިފައިވަނީ 40 ޕޮއިންޓެވެ.
