އިޓަލީގެ އޭސީ މިލާނަށް ކުޅެމުން އަންނަ ޕޯޗުގަލްގެ ހުނަރުވެރި ފޯވާޑް ރަފައެލް ލިއާއޯގެ ކުޅުން ބެލުމަށް، މެންޗެސްޓާ ޔުނައިޓެޑްގެ ސްކައުޓުން މިދިޔަ އާދީއްތަ ދުވަހުގެ ރޭ ސެން ސީރޯ ސްޓޭޑިއަމަށް ގޮސްފިއެވެ.
ކަލްޗިއޯ މާކާޓޯއިން ރިޕޯޓްކޮށްފައިވާ ގޮތުގައި، ޔުނައިޓެޑްގެ ސްކައުޓުން ހާޒިރުވެ ތިބީ މިލާނާއި ޔުވެންޓަސް ބައްދަލުކުރި މެޗު ބެލުމަށެވެ. 0-0 އިން އެއްވަރުވި މި މެޗުގައި އުމުރުން 26 އަހަރުގެ ލިއާއޯ 81 މިނެޓު ކުޅުނު ނަމަވެސް، އޭނާއަށް ލަނޑެއް ކާމިޔާބެއް ނުކުރެވުނެވެ. މެޗު ނިމިގެން ދަނޑުން ފޭބި ވަގުތު މިލާންގެ ސަޕޯޓަރުން ވަނީ އޭނާއަށް ފާޑުކިޔައި އަޑުގަދަކޮށްފައެވެ. މި ނަތީޖާއާއެކު މިލާން މިހާރު އޮތީ ސެރީ އޭ ތާވަލުގެ ތިންވަނައިގައެވެ.
މެންޗެސްޓާ ޔުނައިޓެޑުން މިދިޔަ ހޫނު މޫސުމުގައި މެތިއަސް ކޫންހާ، ބްރަޔަން އެމްބިއުމޯ އަދި ބެންޖަމިން ސެސްކޯ ފަދަ ކުޅުންތެރިން ހޯދުމަށް ބޮޑު ހޭދައެއް ކޮށްފައިވީ ނަމަވެސް، ކޯޗު މައިކަލް ކެރިކްގެ ޓީމު އިތުރަށް ވަރުގަދަކުރުމަށް ޔުނައިޓެޑުން ބޭނުންވެއެވެ. ހާއްސަކޮށް އަންނަ ސީޒަނުގެ ޗެމްޕިއަންސް ލީގުން ޖާގައެއް ކަށަވަރުވުމާ ގާތްވެފައިވާތީ، ޓީމުގެ ފެންވަރު މަތިކުރުމަކީ ކްލަބުގެ މިހާރުގެ އަމާޒެކެވެ.
Advertisement
މިލާނުން ކުރިން ލިއާއޯ އަކީ އެއްވެސް އަގަކަށް ވިއްކާލާނެ ކުޅުންތެރިއެއް ނޫން ކަމަށް ބުނަމުންދިޔަ ނަމަވެސް، މިހާރު އެ ކްލަބުގެ ވިސްނުން ބަދަލުވެފައިވާ ކަމަށް ރިޕޯޓްތައް ބުނެއެވެ. އެގޮތުން 52 މިލިއަން ފައުންޑްގެ ބިޑަކަށް މިލާނުން އޭނާ ވިއްކާލުމަކީ އެކަށީގެންވާ ކަމެކެވެ. މިއީ އެ ކްލަބުގެ މާލީ ހިސާބުތައް ބެލެންސް ކުރުމަށްޓަކައި ކުރަންޖެހޭ ކަމެއްގެ ގޮތުގައި ބެލެވެއެވެ. ލިއާއޯގެ ކޮންޓްރެކްޓްގައި ބާކީ ދެ އަހަރު އޮތްއިރު، އޭނާއަކީ އަރިމަތިންނާއި ފޯވާޑަކަށްވެސް މޮޅަށް ކުޅޭ ކުޅުންތެރިއެކެވެ.
ޓްރާންސްފާ އެކްސްޕަރޓް ފަބްރީޒިއޯ ރޮމާނޯ ހާމަކުރި ގޮތުގައި، އިނގިރޭސި ޕްރިމިއާ ލީގުގެ ބައެއް ކްލަބުތަކުން މިހާރުވެސް ލިއާއޯގެ ހާލަތު ބަލަމުންދެއެވެ. ރޮމާނޯ ބުނީ، މިހާތަނަށް ރަސްމީ އެއްވެސް ހުށަހެޅުމެއް ލިބިފައި ނުވި ނަމަވެސް، ބޮޑެތި ކްލަބުތަކުން އޭނާ ހޯދުމުގެ މަޝްވަރާތައް ނުރަސްމީކޮށް ފަށާފައިވާ ކަމަށެވެ.
ލިއާއޯ ހޯދުމަށް ޔުނައިޓެޑްގެ އިތުރުން ސްޕެއިންގެ ބާސެލޯނާ އާއި ސައުދީ ޕްރޯ ލީގުގެ ކްލަބުތަކުންވެސް ޝައުގުވެރިވެއެވެ. އަދި މުހައްމަދު ސަލާހަށްފަހު ލިވަޕޫލްގެ ކުރިމަގު ބައްޓަންކުރުމަށް އެ ކްލަބުންވެސް ލިއާއޯއަށް ފާރަލަމުންދެއެވެ.
ޔުނައިޓެޑުން ބޭނުންވަނީ ބްރެންޓްފޯޑާ ދެކޮޅަށް ކުޅޭ މެޗުން މޮޅުވެ، ގަދަ ފަހެއްގެ ޖާގަ ކަށަވަރުކުރުމަށެވެ. އަދި 2026 ވަނަ އަހަރުގެ ވޯލްޑް ކަޕަށްފަހު ލިއާއޯގެ އަގު އުފުލިގެން ދިއުމުގެ ކުރިން، މި ޓްރާންސްފާ ނިންމާލުމަކީ ޔުނައިޓެޑްގެ ރޭވުމެކެވެ.
