މެންޗެސްޓާ ޔުނައިޓެޑުގެ ކެޕްޓަން ބްރޫނޯ ފެނާންޑޭޒް، އިނގިރޭސި ޕްރިމިއާ ލީގުގެ މި ސީޒަނުގެ އެންމެ މޮޅު ކުޅުންތެރިޔާގެ މަގާމު ކާމިޔާބުކޮށްފިއެވެ. ޕޯޗުގަލްގެ ހުނަރުވެރި މިޑްފީލްޑަރު ފެނާންޑޭޒް ވަނީ މި މަހުގެ ކުރީކޮޅު ފުޓްބޯޅަ ރައިޓާސް އެސޯސިއޭޝަން (އެފް.ޑަބްލިއު.އޭ) އިން ހޮވި އަހަރުގެ މޮޅު ކުޅުންތެރިޔާގެ މަގާމުވެސް ހޯދާފައެވެ.

ފެނާންޑޭޒް މި މަގާމު ކާމިޔާބުކުރީ އާންމުންގެ ވޯޓާއި ފުޓްބޯޅަ މާހިރުންގެ ޕެނަލަކުން ދިން ވޯޓު އެއްކޮށްލައިގެންނެވެ. މިއީ 2011 ވަނަ އަހަރު ޔުނައިޓެޑުގެ ކުރީގެ ޑިފެންޑަރު ނަމާންޖާ ވިޑިޗް މި އެވޯޑު ހޯދި ފަހުން، ޔުނައިޓެޑްގެ ކުޅުންތެރިއަކަށް މި ޝަރަފު ލިބުނު ފުރަތަމަ ފަހަރެވެ.

މި ސީޒަނުގައި ފެނާންޑޭޒް ދެއްކި މޮޅު ކުޅުމާއެކު އޭނާ ވަނީ މުހިންމު ރެކޯޑުތަކެއްވެސް މުގުރާލާފައެވެ. އެގޮތުން މިދިޔަ ހަފުތާ ބަންދުގައި ނޮޓިންހަމް ފޮރެސްޓާ ދެކޮޅަށް ކުޅުނު މެޗުގައި އޭނާ ވަނީ މި ސީޒަނުގެ 20 ވަނަ އެސިސްޓް ހަމަކޮށް، ޕްރިމިއާ ލީގުގެ އެއް ސީޒަނެއްގައި އެންމެ ގިނަ އެސިސްޓް ހެދުމުގެ ރެކޯޑާ އަރާ ހަމަކޮށްފައެވެ. މީގެ އިތުރުން އޭނާ ވަނީ މި ސީޒަނުގައި ކުޅުނު 37 މެޗުން 8 ލަނޑު ޖަހައި، ޔުނައިޓެޑަށް ލީގުގެ ތިންވަނަ މަގާމާއި ޗެމްޕިއަންސް ލީގުގެ ޖާގައެއް ކަށަވަރުކޮށްދިނުމުގައި މުހިންމު ދައުރެއް އަދާކޮށްފައެވެ.

ފެނާންޑޭޒް ވަނީ މި ސީޒަނުގައި ގޯލު ޖަހާނެ 132 ފުރުސަތު ތަނަވަސްކޮށްދީފައެވެ. މިއީ ލީގުގެ އެހެން އެއްވެސް ކުޅުންތެރިއަކަށްވުރެ އިތުރު އަދަދެކެވެ. މި ލިސްޓުގެ ދެވަނައިގައި އޮތް ލިވަޕޫލްގެ ޑޮމިނިކް ސޮބޮސްލާއީއަށްވުރެ އޭނާ ވަނީ 43 ފުރުސަތު އިތުރަށް ތަނަވަސްކޮށްދީފައެވެ.

މި މަގާމަށް ވާދަކުރި ކުޅުންތެރިންގެ ތެރޭގައި އާސެނަލްގެ ޑޭވިޑް ރާޔާ، ގެބްރިއަލް އަދި ޑެކްލަން ރައިސްގެ އިތުރުން މެންޗެސްޓާ ސިޓީގެ އާލިން ހާލަންޑާއި ނޮޓިންހަމް ފޮރެސްޓްގެ މޯގަން ގިބްސް-ވައިޓް ހިމެނެއެވެ. ޔުނައިޓެޑުން ސީޒަނުގެ ފަހު މެޗުގައި އަންނަ އާދިއްތަ ދުވަހު ބްރައިޓަންއާ ދެކޮޅަށް ނުކުންނާނެއެވެ.

ޓީމުގެ އެހެން ޚަބަރުތަކަށް ބަލާއިރު، ޖެނުއަރީ މަހު ރޫބެން އަމޮރިމް ވަކިކުރުމުން ޓީމާ ހަވާލުވި މައިކަލް ކެރިކް މިހާރު ވަނީ ދާއިމީ ކޯޗެއްގެ ގޮތުގައި ދެ އަހަރުގެ އެއްބަސްވުމެއްގައި ސޮއިކޮށްފައެވެ. އަދި އޭނާގެ ކޯޗިން ޓީމުގައި ހިމެނޭ ސްޓީވް ހޮލެންޑާއި ޖޯނީ އެވަންސް ފަދަ ފަރާތްތަކުންވެސް ވަނީ އާ އެއްބަސްވުމެއްގައި ސޮއިކޮށްފައެވެ.

މީގެ އިތުރުން، މި ސީޒަނުގެ އެންމެ މޮޅު ޒުވާން ކުޅުންތެރިޔާގެ މަގާމު ހޯދާފައިވަނީ މެންޗެސްޓާ ސިޓީގެ އުމުރުން 21 އަހަރުގެ ނިކޯ އޮރައިލީއެވެ. އޭނާ ވަނީ މި ސީޒަނުގައި 34 މެޗު ކުޅެ 5 ލަނޑު ޖަހައި 3 އެސިސްޓް ކާމިޔާބުކޮށްފައެވެ. އޮރައިލީ ވަނީ މި ފަހުން އިނގިރޭސި ގައުމީ ޓީމުންވެސް ޖާގަ ހޯދާ، ތޯމަސް ޓުޗެލްގެ ވޯލްޑް ކަޕް ސްކޮޑުގައިވެސް ހިމެނިފައެވެ.