މޯލްޑިވްސް މާކެޓިންގް އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ) އިން އަންނަ އަހަރު ފަތުރުވެރިކަމުގެ ފެއަރތަކަށް ކުރާ ޚަރަދު ކުޑަކޮށް، ޑިޖިޓަލް ކެމްޕެއިންތަކަށް އިސްކަންދިނުމަށް ނިންމައިފިއެވެ.
އެމްއެމްޕީއާރުސީގެ އޮފީހުގައި ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން އެ ކޯޕަރޭޝަނުގެ ޗެއަރޕާސަން އަބްދުﷲ ޤިޔާސް ވިދާޅުވީ، އަންނަ އަހަރު އެންމެ ބޮޑު އިސްކަމެއް ދޭނީ އޮންލައިން ޑިޖިޓަލް ކެމްޕެއިންތަކަށް ކަމަށެވެ.
"މީގެ ކުރިން އަޅުގަނޑުމެންގެ ވަސީލަތްތަކުގެ 80 އިންސައްތަ ބޭނުންކުރެވެނީ ޓްރެވެލް ޓްރޭޑް ފެއަރތަކަށް. އަންނަ އަހަރު އަޅުގަނޑުމެން ބޮޑަށް އިސްކަން މިދެނީ ޑިޖިޓަލީ ޑްރިވެން ކެމްޕެއިންތަކަށް." ޤިޔާސް ވިދާޅުވިއެވެ.
Advertisement
ޤިޔާސް ވިދާޅުވީ، ޑިޖިޓަލް ކެމްޕެއިންތަކަށް އިސްކަންދިނުމުގެ ސަބަބުން ފެއަރތަކަށް ކުރާ ޚަރަދު ކުޑަކުރެވޭނެ ކަމަށެވެ. އެގޮތުން ވޯލްޑް ޓްރެވަލް މާކެޓް (ޑަބްލިއުޓީއެމް) އަށް ކުރާ ޚަރަދުން އެކަނި 3.5 މިލިއަން ރުފިޔާ ސަލާމަތްކުރެވިފައިވާ ކަމަށް އޭނާ ވިދާޅުވިއެވެ.
އެމްއެމްޕީއާރުސީން ފާހަގަކުރި ގޮތުގައި، ދާދިފަހުން ކުރިއަށް ގެންދިޔަ "އޮންލައިން މިނީ ކެމްޕެއިން" އިން އެއްމަސް ދުވަހުގެ ތެރޭގައި 22 މިލިއަން އިމްޕްރެޝަން ލިބިފައިވެއެވެ. މި ކާމިޔާބީގެ މައްޗަށް ބިނާކޮށް، މީސްމީޑިއާގެ އެކި މަންސަތަކާއި ބުކިންގ ޕްލެޓްފޯމްތަކާ ގުޅިގެން އިތުރު މާކެޓިންގ ކެމްޕެއިންތައް ކުރިއަށް ގެންދިއުމަށް ރާވާފައިވާކަމަށް އެމްއެމްޕީއާރުސީން ބުންޏެވެ.
އަންނަ އަހަރު ފަތުރުވެރިކަމުގެ ސިނާޢަތުން ލިބޭ އާމްދަނީ 5 ބިލިއަން ޑޮލަރަށް އިތުރުކުރުމަކީ ސަރުކާރުގެ އަމާޒެކެވެ. އަދި ރާއްޖެ ޒިޔާރަތްކުރާ ފަތުރުވެރިންގެ ޢަދަދު މި އަހަރަށްވުރެ 15 އިންސައްތަ އިތުރުކުރުމަށްވެސް ސަރުކާރުން ވަނީ އަމާޒު ކަނޑައަޅާފައެވެ.
