ޗައިނާ ސަރުކާރުގެ އެހީގައި މާލޭގެ މަގުތައް ޒަމާނީ ފެންވަރަށް ތަރައްޤީކުރާނީ، މިހާރު ހުރި ހުރިހާ މައްސަލައަކަށްވެސް ހައްލު ލިބޭނެ ގޮތަށް ކަމަށް ޢިމާރާތްކުރުމާއި ގެދޮރުވެރިކަމާއި ބިނާރާ ބެހޭ ވުޒާރާއިން މިއަދު ބުނެފިއެވެ.

މި މަޝްރޫޢުގެ ދަށުން މާލެއާއި ވިލިމާލޭގެިލިމާލޭގެ މަގުތައް ތަރައްޤީކުރުމަށް ޗައިނާ ސަރުކާރާއި ދިވެހި ސަރުކާރާ ދެމެދު އެއްބަސްވުމެއްގައި ސޮއިކޮށްފައިވަނީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިއަހަރުގެ ޖެނުއަރީ މަހު ޗައިނާއަށް ކުރެއްވި ދަތުރުފުޅުގައެވެ. މި މަޝްރޫޢަށް ބޭނުންވާ ދިރާސާތައް ހެދުމަށް ޗައިނާގެ ތަޖުރިބާކާރުންގެ ޓީމެއް ރާއްޖެ އައިސް މިދިޔަ މަހުގެ 22 ވަނަ ދުވަހު ދިރާސާތައް ނިންމާލާފައިވެއެވެ.

ޢިމާރާތްކުރުމާއި ގެދޮރުވެރިކަމާއި ބިނާރާބެހޭ ވުޒާރާގެ ސްޓޭޓް މިނިސްޓަރ އިބްރާހީމް ނަޒީމް ވިދާޅުވީ، މި ވަގުތު ޗައިނާގެ ތަޖުރިބާކާރުންގެ ޓީމުން ފީސިބިލިޓީ ރިޕޯޓެއް ހަދަމުންދާ ކަމަށާއި، މަޝްރޫޢުގެ ޢަމަލީ މަސައްކަތް ފެށޭނީ މި ރިޕޯޓު ނިމުމުންކަމަށެވެ.

ޗައިނާ ސަރުކާރުގެ ހިލޭ އެހީގެ ދަށުން މާލޭގެ މަގުތައް ތަރައްޤީކުރާއިރު، ތާރު އެޅުމުގެ އިތުރުން ފެނާއި ނަރުދަމާގެ ނިޒާމާއި ކަރަންޓު އަޕްގްރޭޑް ކުރުމާއި ސްޓޯމް ވޯޓަރ ނިޒާމާއި ފަޔަރ ހައިޑްރަންޓްގެ ނިޒާމުވެސް ގާއިމު ކުރެވޭނެކަމަށް އެ ވުޒާރާއިން ހާމަކުރިއެވެ.

ވިލިމާލޭގެ މަގުތައް ހެދުމުގެ މަސައްކަތުގެ ދަށުން 5.6 ކިލޯމީޓަރުގެ މަގު ހެދުމަށް ހަމަޖެހިފައިވާއިރު، މި މަސައްކަތް ފެށުމުގެ ކުރިން ކުރަންޖެހޭ ޓޮޕޯގްރަފިކް ސަރވޭއާއި، ޖިއޯޓެކްނިކަލް، ހައިޑްރޮލޮޖިކަލް ސަރވޭގެ މަސައްކަތާއި އީއައިއޭ ހެދުމުގެ މަސައްކަތް ކުރުމަށް މިއަހަރުގެ ކުރީކޮޅު އާރްޑީސީއާ ހަވާލުކޮށްފައިވެއެވެ.

މާލޭގެ މަގުތަކަށް ދިމާވެފައިވާ އެންމެ ބޮޑު މައްސަލައަކީ މަގުތައް ހަލާކުވެފައި އޮތުމާއި ފެންބޮޑުވާ މައްސަލައެވެ. މި މައްސަލަތަކަށް މީގެ ކުރިންވެސް ހައްލެއް ހޯދުމަށް މަސައްކަތްކޮށްފައި ވީނަމަވެސް މިހާތަނަށް އައިރުވެސް ދާއިމީ ހައްލެއް ލިބިފައެއް ނުވެއެވެ. އެހެންކަމުން ސަރުކާރުން ނިންމާފައިވަނީ މި މައްސަލަތަކަށް ދާއިމީ ހައްލެއް ހޯދުމަށެވެ.