ވިލިމާލޭގެ ހިތްފަސޭހަކަން ދެމެހެއްޓުމަށް، އެދި މަޖިލީހަށް ޕެޓިޝަނެއް ހުށަހަޅައިފި އެވެ.
މިދިޔަ އަންގާރަ ދުވަހު މަޖިލީހަށް ހުށަހެޅި ޕެޓިޝަނުގައި ބުނެފައި ވަނީ ވިލިމާލެއަކީ ރާއްޖޭގެ ޖަޒީރާވަންތަކަން ގެއްލުވާނުލައި ރައްޔިތުންގެ ބޭނުންތައް ފުއްދޭ ގޮތަށް ރަށެއް ތަރައްގީކުރާނެ ގޮތުގެ މިސާލެއް ކަމަށެވެ. އެގޮތުން، އެ ޕެޓިޝަނުގައި އެދިފައި ވަނީ ވިލިމާލޭގެ ކަންކަން ދެމެހެއްޓެނިވި ގޮތެއްގައި ކުރިއަށް ގެންދިޔުމަށް ސަރުކާރާއި މާލެ ސިޓީ ކައުންސިލުން، ހަރުދަނާ ފިޔަވަޅުތަކެއް އަޅާކަން، މަޖިލީހުން ކަށަވަރު ކޮށްދިނުމަށް އެދިފަ އެވެ.
ވިލިމާލެއަކީ، މާލެ ސަރަހައްދުގައި ގިނަ ބަޔަކު ހިތްފަސޭހަ ކޮށްލުމަށް ޒިޔާރަތްކުރާ ހިތްގައިމު މާހައުލެއް އޮންނަ ރަށެކެވެ. އަދި އެ ރަށުގެ މަގުތަކުގައި ވެހިކަލްތައް ދުއްވާ މިންވަރު މަދުވުމުން، އެ ރަށަކީ ކުޑަކުދިންނާއި އުމުރުން ދުވަސްވީ ބަލިމީހުންނަށް ވެސް މަގުމަތީގައި ހިނގާބިނގާވެ އުޅެން ފަސޭހަ، ރައްކާތެރި އަމާން ރަށަކަށް ވަނީ ވެފަ އެވެ. އެ ޕެޓިޝަން މަޖިލީހަށް ފޮނުވަން މަޖުބޫރުވީ، ވިލިމާލޭގެ ހިތްގައިމުކަން ނެތިގެން ގޮސްދާނެ ކަމުގެ ބިރު އެ ރަށު ރައްޔިތުންނަށް ބޮޑުވީމަ އެވެ.
އެގޮތުން، "ތަރައްގީގެ" ނަމުގައި ހިނގަމުން އަންނަ ބައެއް ކަންތައްތައް ވިސްނުމެއް ނެތި ތަންފީޒުކޮށްފި ނަމަ، އޭގެ ނޭދެވޭ އަސަރުކުރާނެ އެވެ. އަދި އެކަމުގެ ސަބަބުން ވިލިމާލެއަށް ލިބިގެންވާ ހާއްސަ ހުރިހާ ސިފަތަކެއް ނެތި، އެ ރަށަކީ ވެސް މާލެ ފަދަ ތަނަކަށް ވުމުގެ މަލަމަތި ފެންނަން ފަށައިފި ކަމަށް ބުނެ ވިލިމާލޭގެ ރައްޔިތުން ވަނީ އެ ޕެޓިޝަންގައި ކަންބޮޑުވުންތައް ހިއްސާކޮށްފަ އެވެ. އެހެންކަމުން ވިލިމާލެގެ ހިތްފަސޭހަކަން ދެމެހެއްޓުމަށް އެޅިދާނެ ފިޔަވަޅުތަކެއް އެ ޕެޓިޝަނުގައި ވަނީ ފާހަނގަކޮށްފަ އެވެ.
އެގޮތުން ވިލިމާލެގެ ހިތްފަސޭހަކަން ދެމެހެއްޓުމަށް އެޅިދާނެ ފިޔަވަޅުތަކުގެ ތެރޭގައި ފާހަނގަ ކުރީ އިންޖީނުލީ އުޅަނދު ދުއްވުން މަނާކުރުމެވެ. އެއީ ވިލިމާލޭގައި ބެޓެރި ސައިކަލުތައް އިތުރުވެފައިވާތީ، އެ ސައިކަލުތައް އިތުރު ނުވާހެން، ކޮންޓްރޯލް ކުރުމަށް ފިޔަވަޅު އެޅުމަށް ވިލިމާލެގެ ރައްޔިތުން ވަނީ އެދިފަ އެވެ. ހަމައެއާއެކު އެވެހިކަލްތައް މާލެ ސިޓީ ކައުންސިލުން މެނޭޖުކުރާ ގޮތަށް، ބައިސްކަލު ޝެއަރިން ސިސްޓަމެއް ގާއިމުކުރުމަކީ ރަނގަޅު ކަމެއް ކަމުގައި ދެކޭ ކަމަށް ޕެޓިޝަނުގައި ވަނީ ބުނެފަ އެވެ.
އަދި ދުވަސްވީ ބޮޑެތި ގަސްތައް ކަނޑާލަން ބައެއް ޖަމިއްޔާތަކުން ބާރު އަޅަމުންދާ ކަމަށާއި އަދި ބައެއް ގަސްތަކުގެ ސަބަބުން ގެއްލުންވާ ކަމަށް ބުނެ ގަސް ކަނޑަން އެދޭ ކަމަށް ޕެޓިޝަންގައި ވަނީ ބުނެފަ އެވެ. އެހެންކަމުން ގަސްތައް ހިމާޔަތްކުރުމަށާއި ގަހުގެ މުލުގެ ސަބަބުން ގެއްލުންވާނަމަ، ގަހުގެ މޫ ކެނޑުމުގެ ބަދަލުގައި "ރޫޓް ކޮންޓްރޯލް" ކުރާ އުކުޅުތައް އިހުތިޔާރުކުރުމަށް ޕެޓިޝަންގައި ވަނީ ލަފާދީފަ އެވެ. ހަމައެހެންމެ އުމްރާނީ ތަރައްގީގެ މަސައްކަތް ރާވާއި ހިންގުމަށް، ތަންތަން ބިނާ ކުރާ އިރު ބޮޑެތި ގަސްތަކާއި ފެހި ސަރަހައްދުތަކަކީ ބިނާވެށީގެ ބައެއް ކަމަށް ބަލައިގެން ފަރުމާކުރުމަށް ވަނީ ޕެޓީޝަންގައި އެދިފައެވެ.
އޭގެ އިތުރުން އެ ޕެޓިޝަންގައި އެންމެ ބޮޑު ކަންބޮޑުވުމެއް ފާޅުކޮށްފައި ވަނީ މާލެއާއި ވިލިމާލެ ހިމެނޭހެން، އެ ސަރަހައްދުގެ ޖުމްލަ ހަތަރު ރަށެއް ގުޅުވާލައިގެން ހަދާފައިވާ ތިލަމާލެ ބްރިޖާ މެދުގަ އެވެ. އެގޮތުން ތިލަމާލެ ބްރިޖުގައި ދުއްވާ އުޅަނދުތަކަށް ވިލިމާލެތެރެއަށް ވަނުމުގެ ހުއްދަ ނުދޭނެކަން ކަށަވަރުކޮށްދިނުމަށާއި ބްރިޖު ހުޅުވާއިރު، ތަނަށް އެކަށީގެންވާ ރަނގަޅު ޕާކިން ޒޯނެއް ނުވަތަ އިމާރާތެއް ގާއިމު ކޮށްދިނުމަށް ޕެޓިޝަންގައި ވަނީ އެދިފަ އެވެ.
އެންމެ ފަހު ކަމަކަށް ވިލިމާލޭގެ ހިތްފަސޭހަކަން ދެމެހެއްޓުމަށް ހުށަހެޅި ޕެޓިޝަންގައި ބުނެފައި ވަނީ، ވިލިމާލެއަށް ބްރިޖު ގުޅި ހޮސްޕިޓަލްގެ މަސައްކަތް ނިމެންވާއިރަށް، ބްރިޖު ސަރަހައްދުން ބަލިމީހުންނަށް ހޮސްޕިޓަލަށް އައިސް ގޮސް ހެދޭނެ ރަނގަޅު ނިޒާމެއް ގާއިމުކޮށްދިނުމަށެވެ.
