އިދިކޮޅު ފަރާތްތަކުން ރަސްމާލެ މަޝްރޫއަކީ ގޯސް މަޝްރޫއެއްކަން ސާބިތުކޮށްދިނުމަށް އެކަށީގެންވާ ހުއްޖަތެއް ދެއްކިފައި ނުވާކަމަށް ފުވައްމުލަކު ދެކުނު ދާއިރާގެ މެންބަރު އިބްރާހީމް ހުސައިން ވިދާޅުވެއްޖެއެވެ.
މެންބަރު މިހެން ވިދާޅުވީ ރައްޔިތުންގެ މަޖިލީހުގެ މިއަދުގެ ޖަލްސާގައި، އީގަލް ހިލްސް ކުންފުންޏާއެކު ސަރުކާރުން ވެފައިވާ އެއްބަސްވުމުގެ ތަފްސީލުތައް ހާމަކުރުމަށް ގޮވާލައި ގަލޮޅު ދެކުނު ދާއިރާގެ މެންބަރު މީކާއިލް އަހްމަދު ނަސީމް ހުށަހެޅުއްވި ގަރާރަށް ވާހަކަފުޅު ދައްކަވަމުންނެވެ.
މެންބަރު ވިދާޅުވީ، ރަސްމާލެ މަޝްރޫއަކީ ރާއްޖޭގެ އިގްތިސާދަށް އިންގިލާބީ ބަދަލެއް އަދި ބޮޑު ނަފާއެއް ގެނެސްދޭނެ ތާރީހީ އިންވެސްޓްމެންޓެއް ކަމަށާއި، މިއީ ގައުމަށް ފައިދާހުރި މަޝްރޫއެއްކަން އެނގޭތީ އިދިކޮޅު ފަރާތްތަކުން މަސައްކަތް ކުރަނީ ކޮންމެ ގޮތަކުންވެސް ސަރުކާރުގެ ތަރައްގީގެ މަޝްރޫއު ހުއްޓުވުމަށް ކަމަށެވެ.
Advertisement
ނިމިދިޔަ ސަރުކާރުގެ ބޯހިޔާވަހިކަމުގެ ސިޔާސަތަށް އަލިއަޅުއްވާލައްވަމުން މެންބަރު ވިދާޅުވީ، އެ ސަރުކާރުން ރައްޔިތުންނަށް ގޯތި ދިނީ ކަނޑުއަޑިން ކަމަށާއި، އެ ތަންތަން ހިއްކޭނެ ގޮތެއްވެސް ހޯދިފައި ނުވާ ކަމަށެވެ. އަދި މިހާރުގެ ސަރުކާރުން އެ ގޯތިތައް ހަވާލުކުރުމުންވެސް، އަމިއްލައަށް ގެދޮރު ބިނާކުރުމުގެ ގާބިލުކަން ނެތުމުގެ ސަބަބުން ގިނަ ފަރާތްތަކުން އެ ގޯތިތައް ދިގު މުއްދަތަށް ކުއްޔަށް ދޭންޖެހިފައިވާ ތަން ފެންނަމުންދާ ކަމަށް ވިދާޅުވިއެވެ.
މީގެ އިތުރުން، ރަސްމާލެ މަޝްރޫއުގެ ދަށުން 20 ބިލިއަން ޑޮލަރުގެ ބޮޑު އިންވެސްޓްމެންޓެއް ރާއްޖެއަށް އަންނާނެ ކަމަށާއި، މީގެ ސަބަބުން ކުރިއަށްއޮތް އަހަރުތަކުގައި އަހަރަކު ގާތްގަނޑަކަށް 2 ބިލިއަން ޑޮލަރު ޓެކްސްގެ ގޮތުގައި ދައުލަތަށް ލިބިގެންދާނެ ކަމަށް މެންބަރު އިބްރާހީމް ހުސައިން ވިދާޅުވިއެވެ.
"އަޅުގަނޑުމެން އަބަދުވެސް މި ދައްކަނީ ޓޫރިޒަމަށް އެކަނި ބަރޯސާނުވެ، ދެވަނަ ސިނާއަތެއް އުފައްދާ މާލީ ތަނަވަސްކަން އިތުރުކުރުމުގެ ވާހަކަ. ރިއަލް އެސްޓޭޓްގެ ދާއިރާއިން މިފަދަ ބޮޑު އިންވެސްޓްމެންޓެއް ގައުމަށް އަންނަން އުޅުމުން އެކަން ބަލައިނުގަނެވިގެން އުޅުމަކީ ގަބޫލުކުރެވޭނެ ކަމެއް ނޫން،" މެންބަރު ވިދާޅުވިއެވެ.
އަހަރަކު ދެ ރިސޯޓު ހުޅުވައިގެން އެކަނި ގައުމު ތަރައްގީކުރުމުގެ ދުވެލި ލަސްވާނެކަން ފާހަގަކުރައްވައި، މެންބަރު ވިދާޅުވީ ހަމައެކަނި ގޯތި ދިނުމަކުން ރަސްމާލެ ތަރައްގީ ނުކުރެވޭނެ ކަމަށާއި، އެތަނަށް ބޮޑެތި އިންވެސްޓްމެންޓްތައް ގެންނަންޖެހޭ ކަމަށެވެ. އަދި އަމިއްލަ ފަންޑިންގއާއި ބޮޑެތި ކުންފުނިތައް މެދުވެރިކޮށް މިފަދަ ދެމެހެއްޓެނިވި ތަރައްގީގެ މޮޑެލްތައް ތައާރަފުކޮށްގެން މެނުވީ ރައްޔިތުންނަށް މުއްސަނދިކަމާއި ތަނަވަސްކަން ހޯދައިނުދެވޭނެ ކަމަށްވެސް މެންބަރުގެ ވާހަކަފުޅު ނިންމާލައްވަމުން ވިދާޅުވިއެވެ.
