މިހާތަނަށް 1474 މީހަކު ކެންސަރު ދަފްތަރުގައި ރަޖިސްޓާކޮށްފައިވާ ކަމަށް ހެލްތް ޕްރޮޓެކްޝަން އޭޖެންސީ (އެޗްޕީއޭ) އިން މިއަދު ހާމަކޮށްފިއެވެ.

ދައުލަތުގެ މީޑިޔާއަށް މަޢުލޫމާތު ދެމުން އެޗްޕީއޭ އިން ބުނެފައިވަނީ، މި ޢަދަދަކީ މާލެ ސަރަޙައްދުން މިހާތަނަށް ރަޖިސްޓްރީ ކޮށްފައިވާ މީހުންގެ ޢަދަދު ކަމަށާއި، އަހަރު ނިމުމުގެ ކުރިން މާލެ ސަރަޙައްދުގެ މަސައްކަތްތައް ނިމޭނެ ކަމަށެވެ.

އެޗްޕީއޭ އިން ހާމަކުރި ގޮތުގައި، މާލެ ސަރަޙައްދުގައި އެންމެ ގިނައިން ފާހަގަވެފައިވަނީ އުރަމަތީގެ ކެންސަރާއި، ފުއްޕާމޭގެ ކެންސަރާއި، ތައިރޮއިޑްގެ ކެންސަރުގެ އިތުރުން ލޭގެ ކެންސަރެވެ.

މީގެ އިތުރުން، ރަށްރަށުގެ މަޢުލޫމާތުތައް އެއްކުރުމުގެ މަސައްކަތް އަންނަ އަހަރުގެ ތެރޭގައި ފަށާނެ ކަމަށް އެޗްޕީއޭ އިން ފާހަގަކުރިއެވެ. މި މަސައްކަތް ފުރަތަމަ ފަށާނީ އަތޮޅުތެރޭގެ ބޮޑެތި ހޮސްޕިޓަލްތަކުން ކަމަށާއި، އޭގެ ފަހުން މުޅި ރާއްޖޭގައި މި މަސައްކަތް ކުރިއަށް ގެންދާނެ ކަމަށްވެސް އެޗްޕީއޭ އިން ބުންޏެވެ.

މިހާރު ރާއްޖޭގައި ކެންސަރު ބައްޔާ ގުޅޭ ޚިދުމަތްދޭ ސަރުކާރުގެ މައި ހޮސްޕިޓަލަކީ ހުޅުމާލެ ހޮސްޕިޓަލް ކަމުގައިވީ ނަމަވެސް، މި ބަލީގެ މީހުންނަށް މައިގަނޑު ބޮޑެތި ހުރިހާ ފަރުވާތައް މިހާރުވެސް ދެނީ ރާއްޖެއިން ބޭރުންނެވެ.

ނަމަވެސް، އެންމެ ޒަމާނީ ޚިދުމަތްތަކާއެކު ފުލްފްލެޖް ކެންސަރު ހޮސްޕިޓަލެއް ރާއްޖޭގައި ތަރައްޤީކުރުމަށް ސަރުކާރުން ނިންމައި، މިހާރު ވަނީ އެ މަސައްކަތް ފަށާފައެވެ. މި ހޮސްޕިޓަލް ޤާއިމުކުރެވުމުން، ރާއްޖޭގައި ކެންސަރު ބަލީގެ ފަރުވާ ހޯދާ ފަރާތްތަކަށް ބޮޑު ލުޔެއް ލިބިގެންދާނެއެވެ.